Міністар замежных спраў Украіны Дзьмітры Кулеба заявіў, што беларускія ўлады адмаўляюцца паведаміць інфармацыю аб месцазнаходжаньні трох украінскіх грамадзян — Канстанціна Равуцкага, Яўгена Васільева і Аляксандры Алёшынай, затрыманых 12 жніўня.
Невядома нават, у якім СІЗА яны знаходзяцца. Паводле міністра, Кіеў накіраваў Менску дзьве ноты пратэсту, патрабуючы паведаміць інфармацыю пра ўсіх затрыманых грамадзян Украіны, прычыны іхнага затрыманьня, месцазнаходжаньне ўкраінцаў і дазволіць ім сустрэцца з украінскім консулам.
«Мы патрабуем тэрміновага і безумоўнага вызваленьня з мэтай іх вяртаньня ва Ўкраіну», — заявіў Дзьмітры Кулеба.
У сувязі з затрыманьнямі міністар замежных спраў Украіны заклікаў украінцаў устрымацца ад наведваньня Беларусі, а тых украінцаў, якія ўжо знаходзяцца на беларускай тэрыторыі, праяўляць павышаную ўвагу і асьцярожнасьць, пазьбягаць месцаў масавага збору людзей, ня ўдзельнічаць у дэманстрацыях і акцыях пратэсту, сачыць за навінамі і рэкамэндацыямі мясцовых уладаў.
Пазьней Офіс прэзыдэнта Ўкраіны апублікаваў сваю заяву, у якой назваў затрыманьне ўкраінцаў незаконным і запатрабаваў тэрмінова іх вызваліць.
«На думку ўкраінскага боку, яны не парушалі ніякіх законаў Рэспублікі Беларусь, ня ўдзельнічалі ні ў масавых беспарадках, ні ў масавых акцыях, не перавозілі забароненыя рэчы і матэрыялы. Праваабаронцы наведвалі Беларусь выключна дзеля атрыманьня дакладнай інфармацыі пра тое, што там адбываецца, і для камэнтаваньня нядаўніх падзеяў у Менску для ўкраінскіх СМІ. Свабода слова і свабода перамяшчэньня — асноўныя дэмакратычныя прынцыпы, якія шануюцца ва ўсім сьвеце. Іх парушэньне недапушчальнае», — заявіў кіраўнік прэзыдэнцкага офіса Андрэй Ярмак.
12 жніўня стала вядома пра затрыманьне двух украінскіх грамадзян — Канстанціна Равуцкага і Яўгена Васільева. Паводле беларускай праваабаронцы Тацяны Равякі, яны падазраюцца ў крымінальнай справе аб масавых беспарадках у Менску 10–12 жніўня.
У рамках расьсьледаваньня гэтай справы быў праведзены ператрус у кватэры Тацяны Равякі, дзе яе ўкраінскія калегі і сябры спыніліся раніцай 12 жніўня.
Сьледчыя забралі кампутар Канстанціна Равуцкага, украінскі пашпарт Яўгена Васільева і іншыя рэчы.
Пазьней Офіс прэзыдэнта Ўкраіны апублікаваў сваю заяву, у якой назваў затрыманьне ўкраінцаў незаконным і запатрабаваў тэрмінова іх вызваліць.
«На думку ўкраінскага боку, яны не парушалі ніякіх законаў Рэспублікі Беларусь, ня ўдзельнічалі ні ў масавых беспарадках, ні ў масавых акцыях, не перавозілі забароненыя рэчы і матэрыялы. Праваабаронцы наведвалі Беларусь выключна дзеля атрыманьня дакладнай інфармацыі пра тое, што там адбываецца, і для камэнтаваньня нядаўніх падзеяў у Менску для ўкраінскіх СМІ. Свабода слова і свабода перамяшчэньня — асноўныя дэмакратычныя прынцыпы, якія шануюцца ва ўсім сьвеце. Іх парушэньне недапушчальнае», — заявіў кіраўнік прэзыдэнцкага офіса Андрэй Ярмак.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
