Урад Расейскай Фэдэрацыі 29 траўня ўнёс зьмены (PDF) у распараджэньне аб забаронах на ўезд з прычыны пандэміі каранавірусу. Цяпер у Расею дазволілі ўяжджаць грамадзянам Беларусі, якія працуюць вахтавым мэтадам.
Каранавірус у Беларусі і ў сьвеце. Як разьвіваюцца падзеі >>
Сам расейскі ўрад не абвяшчаў пра такое рашэньне. Пра зьмены стала вядома толькі вечарам 1 чэрвеня з паведамленьня ТАСС.
У сьпіс тых, каго пусьцяць у Расею, дадалі тых «вахтавікоў», якія працуюць у бесьперапынных вытворчых працэсах на прамысловых аб’ектах ядзернай энэргетыкі, будаўніцтва, здабычы нафту і газу, перапрацоўкі карысных выкапняў, а таксама ўдзельнікаў касьмічных праграмаў і жыхароў Байкануру (гораду ў Казахстане, дзе Расея арандуе касмадром).
Забарону на ўезд для беларусаў у Расеі прынялі яшчэ ў сярэдзіне сакавіка — тлумачылі яе тым, што Беларусь недастаткова супрацьстаіць каранавірусу. Аляксандар Лукашэнка казаў, што гэта Расея, якая «ўся палае ад каранавірусу», закрыла мяжу, а яшчэ пытаньне, «хто ад каго павінен закрывацца».
Ад 18 сакавіка ўехаць у Расею маглі тыя беларусы, хто мае від на жыхарства ў Расеі або зьяўляецца сямейнікамі грамадзянаў Расеі, ці ў якіх у Расеі памёр блізкі родзіч. Таксама дазвалялі ўезд тым, хто ехаў транзытам праз Расею, работнікам міжнароднага транспарту і дыпляматам.
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
