Намесьнік міністра дзяржаўнай маёмасьці Польшчы Артур Собань заявіў, што межы краіны могуць быць адкрытыя 15 чэрвеня.
На яго думку, гэтага чакаюць многія буйныя кампаніі, асабліва авіяперавозчык Polska Grupa Lotnicza, альбо LOT. Толькі так можна «ажывіць» аднаго з гігантаў авіяцыйнага рынку, паслугамі якога карысталіся многія іншаземцы, перакананы ён.
Намесьнік міністра, адказваючы на пытаньне «Польскага радыё», падкрэсьліў, што канчатковае слова застаецца за прэм’ер-міністрам Матэвушам Маравецкім, але ён староньнік таго, каб гэта здарылася не пазьней за 15 чэрвеня.
Вяртаючыся да кампаніі LOT, Артур Собань прызнаў, што без аднаўленьня паветраных зносінаў гэты бізнес найбольш рызыкуе, бо знаходзіцца ў значна больш складанай сытуацыі, чым да пандэміі. Калі перад каранавірусам былі задумы набываць іншыя авіякампаніі, то цяпер задача хаця б вярнуцца да ранейшых пазыцый.
Калі эканамічны шок не спыніць, наступствы будуць вельмі сумныя, канстататаваў польскі чыноўнік.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
