Суд у Магілёве над журналістам Алесем Асіпцовым пачаўся 12 траўня каля 9.30. Вырак — 10 сутак арышту. Асіпцоў трымае галадоўку ад 9 траўня.
Пазаштатны карэспандэнт БелаПАН Алесь Асіпцоў быў затрыманы за нібыта адміністрацыйнае правапарушэньне, але за якое, не было вядома да самага суду.
На працэс у суд Кастрычніцкага раёну не пусьцілі дачку журналіста Яніну і актывістаў, якія прыйшлі яго падтрымаць.
Суд адбываецца ў кабінэце судьдзі, быццам усе залі занятыя і ў сувязі з эпідэміялягічнай сітуацыяй. Сама судьдзя Натальля Ясенка была бяз маскі.
Асіпцоў перад судом распавёў, што яго затрымалі, калі ён фатаграфаваў людзей, якія зьбіраліся зладзіць акцыю «Антыпарад».
Паводле журналіста, да яго падышоў міліцыянт і паведаміў, што ён мусіць прайсьці зь ім, бо на яго заведзеная адміністрацыйная справа. Пазьней Алесь Асіпцоў даведаўся, што справу супраць яго завялі за ўдзел у сустрэчы 5 траўня каля крамы «Гіпа» з прыхільнікамі блогера Сяргея Ціханоўскага (самаго блогера на сустрэчы не было).
Сьведкі-міліцыянты «ня памятаюць», ці быў Асіпцоў у масцы
Сьведка міліцыянт Яўген Жукаў расказаў, што ўвечары 5 траўня на паркоўцы каля крамаў «Гіпа» і «5 элемэнт» зьехаліся аўтамабілісты. У сустрэчы бралі ўдзел каля 50 чалавек, зазначыў сьведка. Паводле яго, людзі абмяркоўвалі сытуацыю ў краіне, «казалі, што ўсё дрэнна», а закончылася акцыя словамі «Далоў вусатага таракана».
«А гэты таварыш быў сярод іх», — сказаў сьведка пра Алеся Асіпцова, але дакладна апісаць ягоны ўдзел у несанкцыянаванай акцыі так і ня змог.
«На яго зьвяртаць увагу задача ня ставілася, таму я за ім не сачыў. Ён сам не мітынгаваў, але выказваў згоду з тым, што там адбывалася», — сказаў пра журналіста міліцыянт Жукаў. Паводле сьведкі, у Асіпцова ён ня бачыў журналісцкага бэджа з пасьведчаньнем.
Асіпцоў спытаў у сьведкі, ці быў ён на сустрэчы ў мэдычнай масцы.
«Цікавае пытаньне. Трэба падумаць», — сказаў сьведка. Раней ён заяўляў, што добра бачыў твар Алеся Асіпцова і таму цяпер пазнаў яго ў судзе.
Ня змог дакладна адказаць на пытаньне пра маску ў Асіпцова і другі сьведка, міліцыянт Аляксандар Сераштан.
«Па-мойму, не», — сказаў сьведка. Нічога пэўнага пра ўдзел журналіста ў сустрэчы, якую ён назваў «мітынгам», міліцыянт таксама ня змог паведаміць.
«Усе кантактавалі адзін з другім, ён таксама, але з кім дакладна ён кантактаваў, сказаць не магу», — паведаміў сьведка.
Дакладнае месца, дзе знаходзіўся Алесь Асіпцоў, сьведка вызначыць ня змог. «Сярод людзей». Між тым, паводле журналіста, ён трымаўся на адлегласьці 10-25 мэтраў ад кола людзей, бо назіраў за падзеямі і здымаў іх на фота.
Асіпцоў не прызнаў віны, працягнуў галадоўку
Алесь Асіпцоў віны не прызнае: ён заяўляе. што працаваў на той сустрэчы як журналіст, меў журналісцкае пасьведчаньне, насіў журналісцкі бэдж, прафэсійную тэхніку і рэдакцыйнае заданьне. Паводле Асіпцова, яго везьлі ў аддзел міліцыі з парушэньнем нормаў санітарыі, ён выказваў пратэст, а потым абвясьціў галадоўку.
Пасьля выраку — 10 сутак арышту — Асіпцоў заявіў, што працягне галадоўку.
З 21.00 9 траўня Алесь Асіпцоў на знак пратэсту не прымае ежу, у судзе ён сказаў, што адчувае сябе блага. Аспіцоў дадаў, што максымальнае пакараньне яму толькі дадасьць гучнасьці гэтай незаконнай, на яго думку, справе. Судзьдзя не задаволіла хадайніцтва Асіпцова і ягонага адваката аб правядзеньні працэсу ў судовай залі.
Пасьля суду Алесь сказаў, што не разьлічваў на справядлівы прысуд, а гэты вырак прыцягнуў увагу да адсутнасьці свабоды слова ў Беларусі і, у прыватнасьці, у Магілёўскай вобласьці, дзе ў гэтыя дні ён стаў ужо трэцім асуджаным да арышту журналістам-фрылянсэрам.
«Галадоўку спыняць ня буду, далей усе будзе залежаць ад майго здароўя», — сказаў Асіпцоў.
Калегі і сябры пажадалі журналісту вытрымкі. Алесь Асіпцоў напісаў скаргу на пастанову Кастрычніцкага раённага суду Магілёва, бо лічыць прыцягненьне яго да суду незаконным.
Алесь Асіпцоў зьнік 9 траўня — у гэты дзень у Бабруйску прайшоў несанкцыянаваны «антыпарад», на які заклікаў блогер Сяргей Ціханоўскі. Перад акцыяй затрымалі шэраг журналістаў.
Калі зьнік Асіпцоў, ягоныя калегі і родзічы тэлефанавалі ў бабруйскія УУС і РАУС, а таксама ў ДПС — там не далі ніякай дакладнай інфармацыі пра Алеся, а жонцы параілі пісаць заяву аб зьнікненьні. Дачка журналіста прасачыла тэлефон бацькі праз адмысловую праграму — апарат знаходзіцца ў Бабруйску, на вуліцы Гогаля, 18. Гэта аддзел міліцыі Ленінскага раёну Бабруйску.
11 траўня стала вядома, што Асіпцоў чакае суду не ў Бабруйску, а ў магілёўскім ізалятары, і там ён быў зь вечара 9 траўня. Суд прызначылі толькі на 12 траўня — патлумачылі адкладаньне працэсу загружанасьцю судзьдзяў.
Публікацыя падрыхтаваная з выкарыстаньнем інфармацыі БелаПАН.
