У Беларусі пацьвердзілі 4-ы выпадак захворваньня на каранавірус

03 сакавік 2020, 20:08 абноўлена 03 сакавік 2020, 20:26

Міністэрства аховы здароўя пацьвердзіла чацьвёрты выпадак захворваньня на каранавірус.

Тэсты яшчэ двух чалавек маюць станоўчы вынік, робіцца лябараторная дыягностыка для ўдакладненьня. Гэтыя людзі мелі кантакты так званага 1-га ўзроўню зь вірусаносьбітамі.

Паводле Міністэрства здароўя, пачатковыя тэсты гэтых людзей былі адмоўныя, таму можна зрабіць выснову, што пацыентаў ізалявалі да моманту, калі вірус пачаў вылучацца з арганізму. Гэта нібыта выключыла магчымасьць далейшай перадачы інфэкцыі.

Усе пацыенты, якія знаходзяцца пад назіраньнем, пачуваюцца задавальняльна, уключна з хворымі на каранавірус.

Захварэў на каранавірус грамадзянін Беларусі. Не ўдакладняецца грамадзянства двух чалавек, якія знаходзяцца пад падазрэньнем.

За час працы праграмы лябараторыя РНПЦ эпідэміялёгіі і мікрабіялёгіі правяла больш за 5 тысяч тэстаў, паведамляе Міністэрства здароўя.

Што трэба ведаць пра новы каранавірус з Кітаю

Невядомы раней вірус выявілі ў кітайскім горадзе Ўхань у сьнежні 2019 году.
Афіцыйнай назвай хваробы ад новага каранавірусу з Кітаю стала COVID-19 (coronavirus disease).
Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.