Патрульныя караблі ВМС Пэру затрымалі «наркасубмарыну» з грузам какаіну вагой амаль дзьве тоны, прызначанага для ЗША, паведаміла мясцовае выданьне El Comercio.
Таксама затрымалі экіпаж судна, у які ўваходзілі двое калюмбійцаў, мэксыканец і эквадорац.
Адзначаецца, што паўпаглыбнае судна затрымалі 7 сьнежня за 180 міляў ад берага ў паўднёвай частцы Ціхага акіяну. Увечары 11 сьнежня яго даставілі на базу ВМС Пэру ў Паітэ.
«Чацьвёра затрыманых у ходзе апэрацыі будуць дастаўлены ў Ліму, як і дзьве тоны какаіну. Субмарына застанецца ў распараджэньні ВМС для дэталёвага дасьледаваньня», — цытуе пракурора Хорхе Чавэс Карціна El Comercio. Паводле Чавэса, падлодка была загружаная ў мангравых лясах на поўдні Эквадору.
Пэру, Калюмбія і Балівія — найбуйнейшыя вытворцы какаіну ў сьвеце.
