Пра гэта Свабодзе паведаміў начальнік аддзела інфармацыі і сувязяў з грамадзкасьцю Цэнтральнага апарата Сьледчага камітэту Беларусі Сяргей Кабаковіч.
Пра тое, што Канстанцін Бурыкін, вядомы таксама як «бацюшка са свастыкай», выйшаў на свабоду, раніцай 18 лістапада паведаміў партал Tut.by. Як стала вядома Свабодзе, за Бурыкіным у Жлобін, дзе ён дабываў пакараньне, ужо выехала яго жонка Вольга.
Прычынай вызваленьня Бурыкіна стала завяршэньне 3-гадовага тэрміну, які асуджаны праваслаўны сьвятар адбыў у поўным абʼёме. Разам з тым, расьсьледаваньне крымінальнай справы, паводле якой Бурыкін падазраецца ў прычыненьні сэксуальнага гвалту ўласнай дачцэ Аляксандры, працягваецца.
«Расьсьледаваньне гэтай крымінальнай справы не спыненае, — паведаміў Свабодзе прадстаўнік СК Сяргей Кабаковіч. — Гэта ўсё, што я пакуль магу паведаміць».
Аляксандра Бурыкіна на дадзены момант недаступная да камэнтароў.
Хто такі Канстанцін Бурыкін
- Грамадзянін Расеі Канстанцін Бурыкін быў праваслаўным сьвятаром, пабудаваў храм у Гатаве пад Менскам.
- Яго называлі духоўнікам нэанацысцкай арганізацыі «Русское национальное единство» (РНЕ), ён насіў тату свастыкі на грудзях і герба нацысцкай Нямеччыны на плячы.
- Ён быў таксама першым намесьнікам старшыні Беларускай фэдэрацыі паўэрліфтынгу.
- У лістападзе 2016 году арыштаваны, і ў ліпені 2017-га асуджаны на тры гады калёніі ўзмоцненага рэжыму за незаконнае захоўваньне зброі. У лістападзе 2019-га выйшаў на волю.
- На яго завялі новыя крымінальныя справы за гвалтаваньне непаўналетняй дачкі, а таксама за прысваеньне грошай у буйным памеры.
- Бурыкін зьвяртаўся да Аляксандра Лукашэнкі з просьбай аб памілаваньні — прызнаў віну адносна зброі, але прасіў не пазбаўляць яго волі «дзеля чатырох дзяцей», таксама казаў, што «спыніў супрацу з РНЕ, калі ўлады абвясьцілі арганізацыю экстрэмісцкай».
