Расейскае выданьне «Коммерсантъ» сьцьвярджае, што атрымала доступ да праграмы эканамічнай інтэграцыі Расеі і Беларусі, якую парафіявалі прэм’ер-міністры 6 верасьня. У ёй «на ўзроўні эканомік фактычна ідзе гаворка пра стварэньне з 2022 году канфэдэратыўнай дзяржавы».
Афіцыйна праграма не публікавалася, падрабязных камэнтароў пра яе не давалі ні беларускі, ні расейскі бок. «Коммерсантъ» сьцьвярджае, што праект, узгоднены прэм’ерамі (але яшчэ не кіраўнікамі дзяржаваў — гэта чакаецца ў сьнежні), «даволі радыкальны», хоць у ім «няшмат канкрэтыкі». Паводле выданьня, у праекце:
- выстаўленьне бакамі да 1 лістапада 2019 году прапановаў «дарожных мапаў» аб’яднаньня эканомік і падрыхтоўка «заканадаўчых крокаў» для інтэграцыі да канца 2020 году;
- пачатак працы «ў аб’яднаным рэжыме» ў большасьці выпадкаў заплянаваны на 1 студзеня 2021 году;
- аб’яднаньне падатковых сыстэмаў, адзіны Падатковы кодэкс;
- аб’яднаньне мытнай палітыкі, супольныя мытныя рэйды, агульная інфармацыйная сыстэма і «траха не агульная мытная служба»;
- аб’яднаны рэгулятар рынкаў газу, нафты, нафтапрадуктаў і электраэнэргіі;
- «гарманізацыя» макраэканамічнай палітыкі і ўніфікацыя валютнага кантролю, аб’яднаньне сыстэмаў аплаты, адзіны рэжым абароны абароны інвэстыцыяў;
- агульны рэжым рэгуляваньня аграрных рынкаў, гандлю, транспарту і сувязі, адзіная антыманапольная палітыка і рэжым абароны спажыўцоў;
- уніфікацыя гаспадарчага заканадаўства (магчыма, Грамадзянскіх кодэксаў), адзіны рэжым уліку маёмасьці;
- узаемны доступ да дзяржаўных закупак;
- скасаваньне платы за роўмінг ад 1 чэрвеня 2020 году;
- «гарманізацыя» прамысловай палітыкі (што гэта значыць, выданьне не бярэцца гадаць) і «ўзгодненая палітыка» на рынку працы і ў сацыяльнай абароне;
Пра адзіную валюту і аб’яднаньне эмісійных банкаў гаворкі не ідзе, таксама ня згадваюцца абарона, дзяржаўная бясьпека, суды, адукацыя, ахова здароўя і дзяржаўнае кіраваньне.
«Адзначым, што прынамсі да 2022 году казаць пра „фактычнае аб’яднаньне“ дзьвюх краінаў з наступным пераходам у „надбудовачную“ структуру цэнтральных уладных паўнамоцтваў Расеі і Беларусі зыходзячы з „Праграмы дзеяньняў“ наогул няма падставаў — у дакумэнце ідзе гаворка толькі пра эканамічную інтэграцыю», — адзначае выданьне.
Ды «Коммерсантъ» прагназуе, што выканаць праграму «на роўных» амаль немагчыма — найбольш імаверна, што пры такой праграме Беларусь будзе проста прымаць расейскія нормы.
***
«Коммерсантъ» — адно з найбуйнейшых і найстарэйшых дзейных палітычна-эканамічных выданьняў Расеі, з найбольш цытаваных у тым ліку дзяржаўнымі СМІ Расеі. Галоўны акцыянэр — блізкі да Крамля алігарх Алішэр Усманаў.
