Напярэдадні сустрэчы з Пуціным Лукашэнка абмеркаваў з урадам «Саюзную дзяржаву».
Аляксандар Лукашэнка 24 сьнежня правёў нараду ў пытаньнях супрацы з Расеяй, перадае ягоная прэс-служба. Мяркуючы па фота, на нарадзе прысутнічалі прэм’ер, шэраг міністраў, старшыня Савету рэспублікі і старшыня КДБ, кіраўніца Адміністрацыі прэзыдэнта.
Паводле Лукашэнкі, «усебаковы характар нашых стасункаў мае сур'ёзнае значэньне ня толькі для Беларусі, але таксама і для Расеі», і гэтыя стасункі будуюцца на «сыстэмнай» і «плянавай» аснове Але ён адзначыў, што рашэньні пра стасункі ў так званай «Саюзнай дзяржаве», прынятыя бакамі, «ня ўсе выконваюцца».
«Ёсьць праграма дзеяньняў, — казаў Лукашэнка пра прынятую паўгода таму праграму «Саюзнай дзяржавы» на 5 гадоў. — Мы доўга да яе рыхтаваліся, вылучылі кожнае пытаньне, ўзгаднілі і прапісалі ўсё, на што здольныя мы і на што здольная была перш за ўсё Расейская Фэдэрацыя. У пляне падрыхтоўкі ў тыя часы многія нашыя прапановы аб больш цеснай інтэграцыі не былі падтрыманыя».
Ужо заўтра, 25 сьнежня Лукашэнка мае сустрэцца ў Маскве з Уладзімірам Пуціным. Сустрэчу пацьвердзіў пакуль толькі беларускі бок. Паводле паведамленьня прэс-службы Лукашэнкі, асаблівая ўвага на сустрэчы будзе нададзеная «рэалізацыі ранейшых дамоўленасьцей у інтэграцыйных фарматах».
На сустрэчы, як раней абяцаў Лукашэнка, галоўным будзе пытаньне расейскага падатковага манэўру і інтэграцыі, «каб не было, што кіраўнік здаў Беларусь за бочку нафты». Але пасьля Лукашэнка дадаў, што сустрэча з Пуціным «можа і не адбыцца».
Да таго на сустрэчы з расейскімі журналістамі Лукашэнка жорстка адрэагаваў на прапановы расейскага прэм’ер-міністра Дзьмітрыя Мядзьведзева аб больш глыбокай інтэграцыі ў рамках так званай Саюзнай дзяржавы (агульных валюты, суду і мытні), а таксама казаў, што шантажаваць Беларусь марна.
Апошні раз Лукашэнка і Пуцін сустракаліся 6 сьнежня ў Санкт-Пецярбургу. Тады Лукашэнка публічна спрачаўся з Пуціным адносна цэнаў на газ.
Сёлета Лукашэнка і Пуцін сустракаліся таксама ў кастрычніку, у верасьні, у жніўні, у ліпені (неафіцыйна), у чэрвені і ў траўні. Пасьля ўсіх гэтых сустрэчаў пра нейкія значныя вынікі ў восьтрых пытаньнях расейска-беларускіх дачыненьняў, як то ў «харчовых войнах» або энэргарэсурсах, не паведамлялася.
