Другі год запар расьце валавы рэгіянальны прадукт (ВРП) Менску, які складае ўжо траціну ВУП усёй Беларусі, паведаміла 4 верасьня першы намесьнік старшыні Камітэту эканомікі Менгарвыканкаму Тацяна Краўчанка.
У Менску фармуецца палова дзяржаўнага бюджэту, 70% аптовага таваразвароту, 70% экспарту паслуг, 40% экспарту тавараў і каля 30% розьнічнага таваразвароту.
Паводле прадстаўніцы Менгарвыканкаму, за 7 месяцаў 2018 году сфэра паслугаў спрычынілася да фармаваньня 70% ВРП, сфэра вытворчасьці — толькі 30%. У сярэднім у Беларусі гэтая прапорцыя іншая — 50 на 50.
Суадносіны на карысьць сфэры паслуг характэрныя для вялікіх гарадоў ва ўсім сьвеце. А ў Злучаных Штатах Амэрыкі яны ўжо складаюць 80 на 20 у сярэднім па ўсёй краіне.
Чыноўніца дадала, што на пасьпяховае разьвіцьцё сталіцы станоўча ўплываюць індывідуальныя прадпрымальнікі. Іх у горадзе цяпер 75 тысяч.
Менскія айцішнікі захопліваюць амэрыканскія рынкі
«40% росту экспарту паслуг Менску прыпадае на кампутарныя паслугі», — сказала Тацяна Краўчанка. Найбольшы рост далі айцішнікі — каля 800 мільёнаў даляраў. На першым месцы сярод зацікаўленых у імпарце беларускіх ІТ-паслуг — ЗША.
На другім месцы пасьля ІТ-сэктару — транспартнікі.
«І гэта зьвязана з транзытным становішчам Беларусі, — сказала Тацяна Краўчанка. — Гэта і магчымасьці Вялікага шаўковага шляху, і перавозкі з Расеі ў краіны Эўразьвязу».
Што да экспарту тавараў, то ён у Менску таксама павялічыўся: за 7 месяцаў прырост склаў 1,5 мільярда даляраў. Галоўныя спажыўцы — Расея, Украіна, Латвія.
