Пра гэта 14 студзеня паведамляе расейскае дзяржаўнае інфармацыйнае агенцтва «РІА Навіны».
Дэпутат лічыць, што дамова «аднабакова выгадная» Ўкраіне. «Бо без абумоўленьня мэханізмаў партнэрства, супрацоўніцтва і дружбы ў дамове мы прызнаем тэрытарыяльныя межы Ўкраіны, а яны, адпаведна, нашы — на момант падпісаньня і ратыфікацыі гэтага дакумэнту. Гэта значыць, гаворка ідзе пра тое, што, падпісаўшы гэтую дамову, Расея ў 1997-м, а потым у часе ратыфікацыі ў 1999 годзе пацьвердзіла, што яна лічыць, скажам, Крым і Севастопаль часткай тэрыторыі Ўкраіны», — адзначыў Затулін.
Складзеная ў 1997 годзе Дамова аб дружбе, супрацоўніцтве і партнэрстве паміж Расеяй і Ўкраінай зьяўляецца асноватворным дакумэнтам расейска-ўкраінскіх адносін. Яна прадугледжвае стратэгічнае партнэрства дзьвюх краін «на аснове прынцыпаў узаемнай павагі, сувэрэннай роўнасьці, тэрытарыяльнай цэласнасьці, непарушнасьці межаў, мірнага ўрэгуляваньня спрэчак, непрымяненьня сілы або пагрозы сілай, уключаючы эканамічныя і іншыя спосабы ціску».
У лютым 2014-га невядомыя ўзброеныя людзі, якіх называлі «зялёнымі чалавечкамі», захапілі галоўныя дзяржаўныя ўстановы Аўтаномнай Рэспублікі Крым і ўзьнялі над будынкамі расейскія сьцягі. Акрамя таго, яны блякавалі ўкраінскія ваенныя часткі. Пасьля ў Расеі прызналі, што «зялёныя чалавечкі» — расейскія вайскоўцы.
16 сакавіка 2014 на тэрыторыі Крыма і горада Севастопаля адбыўся так званы рэфэрэндум аб статусе паўвострава, па выніках якога Расея заявіла пра ўключэньне Крыма ў свой склад.
Украіна афіцыйна абвясьціла пачаткам часовай акупацыі Крыма Расеяй 20 лютага 2014-га. Міжнародныя арганізацыі прызналі акупацыю і анэксію Крыма незаконнай і асудзілі дзеяньні Расеі. Масква адмаўляе акупацыю паўвострава і называе гэта «аднаўленьнем гістарычнай справядлівасьці».
