«Вядома, я не ва ўсім згодны з канкрэтнымі публікацыямі гэтых аўтараў. Аднак мне здаецца, што гэтае затрыманьне было зроблена з прадузятых матываў. Чаму гэтыя матывы паўсталі, чаму раптам абмеркаваньне тэмаў, зьвязаных з „русским миром“, стала ганебным у Беларусі — усё гэта прадмет сурʼёзнага роздуму ня толькі для грамадзянскай супольнасьці, але і для ўладаў нашай краіны, якія, як я разумею, падзяляюць канцэпцыю „русского мира“. Мая асабістая думка — гэтыя людзі павінны быць вызваленыя», — адзначыў дэпутат у інтэрвію EADaily.
Затулін лічыць, што з арыштаванымі аўтарамі «Регнума» можна было б спрачацца, але не зьвяртацца да крымінальна-працэсуальных захадаў.
«Нязгода зь імі магла б праяўляцца ў адпаведнай форме. Можна публікавацца, адстойваць сваю пазыцыю, але зьвяртацца да адміністрацыйных, крымінальна-працэсуальных захадаў для таго, каб прымусіць гэтых людзей замаўчаць, катэгарычна няправільна», — заявіў Затулін.
Дэпутат ад кіроўнай у Расеі партыі сказаў, што Маскве варта заняць цьвёрдую пазыцыю з нагоды арышту гэтых аўтараў:
«Расейская Фэдэрацыя, як мне здаецца, павінна была б у спакойным рэжыме, не абавязкова канфліктуючы зь Беларусьсю, але ўсё ж дастаткова цьвёрда выказаць свой пункт гледжаньня пра неадэкватнасьць гэтых захадаў», — сказаў ён.
