Ураган «Ірма» дасягнуў амэрыканскага штату Флорыда. Чакаецца, што на шляху ўрагану будуць і гарады зь вялікай колькасьцю насельніцтва — такія як Тампа.
Губэрнатар Флорыды Рык Скот загадаў эвакуацыю больш чым пяці мільёнаў чалавек. Цяпер ураган зноў набраў сілу і мае чацьвертую катэгорыю небясьпекі, паведаміў Нацыянальны цэнтар папярэджаньня ураганаў ЗША. Раней ураган узмацняўся да апошняй, пятай катэгорыі, а потым суцішыўся да трэцяй.
Ураган «Ірма» гаспадарыць у Атлянтыцы ўжо пяты дзень. У сераду ён абрынуўся на францускія заморскія тэрыторыі. На астравах разбурана да 95% будынкаў, няма электрычнасьці.
Ураган ужо забраў жыцьці 21 чалавека і пакінуў пасьля сябе катастрафічныя разбурэньні, паведамляе Reuters.
Паводле прагнозаў ААН, ад урагану «Ірма» можа пацярпець да 37 мільёнаў чалавек.
