За месяц, пачынаючы з 15 траўня, актывісты «Моладзі БНФ» сабралі больш за тысячу подпісаў за наданьне вуліцы ў Менску імя Ларысы Геніюш. 16 чэрвеня яны перададуць подпісы ў Менскі гарадзкі савет дэпутатаў.
Пра гэта карэспандэнту Свабоды сказаў лідэр «Моладзі БНФ» Юрась Лукашэвіч.
Далей актывісты працягнуць зьбіраць подпісы за наданьне імя Ларысы Геніюш вуліцы ў Зэльве.
«У Менску зьбіраць было ня цяжка, больш за 1000 подпісаў сабралі за 5–6 выхадаў на вуліцу, хоць і пачалі месяц таму, але з прычыны сэсіі і экзамэнаў нячаста выходзілі, — кажа Юрась Лукашэвіч. — Людзі падпісваюцца актыўна. На жаль, большасьць ня ведае, хто такая Ларыса Геніюш, але ўсім падпісантам і тым, хто цікавіўся, мы расказвалі пра яе, яе біяграфію, творчасьць і жыцьцёвы шлях. Таксама раздавалі ўлёткі зь яе біяграфіяй і творчасьцю. Улёткі зараз дадрукуем і пачнём зноў раздаваць на вуліцы, каб больш людзей пра яе ведала».
Паводле Юрася Лукашэвіча, міліцыянты перашкаджалі зьбіральнікам толькі аднойчы, з той прычыны, што на тэчцы была бел-чырвона-белая стужка.
«Хацелі дачапіцца, але мы прасілі паказаць закон, які забараняе зьбіраць подпісы, і ў выніку яны адчапіліся».
Ініцыятары зьбіраньня подпісаў спадзяюцца, што ўлады прыслухаюцца да такой колькасьці грамадзян.
«Мы ўклалі шмат высілкаў у кампанію #Геніюш2016, і хочацца мець канкрэтны вынік. Але калі адказ будзе адмоўны, то гэта пакажа рэальны стан так званай „мяккай беларусізацыі“ і ўвогуле адносін улады да беларушчыны», — кажа Юрась Лукашэвіч.
Зьбіраць подпісы за наданьне вуліцам у Менску і ў Зэльве імя Ларысы Геніюш пачалі 15 траўня.
