15 чэрвеня — дзень Скарыны ў Празе

Міжнародны сымпозіюм «Францішак Скарына і Прага» арганізавалі Нацыянальная бібліятэка Чэхіі, Нацыянальная бібліятэка Беларусі і амбасада Беларусі ў Празе. У ім бяруць удзел навукоўцы зь Беларусі, Літвы і Чэхіі.

• Сяргей Абламейка

15 чэрвеня стаў днём Скарыны ў чэскай сталіцы. Адбыліся міжнародны навуковы сымпозіюм «Скарына і Прага», адкрыцьцё дзьвюх выставаў, прысьвечаных беларускаму асьветніку, і два ўскладаньні кветак да памятных мясьцін.

Кветкі да памятнай дошкі Францішку Скарыну разам з удзельнікамі сымпозіюму ўсклаў міністар замежных спраў Беларусі Ўладзімер Макей.

«Трэба больш размаўляць на беларускай мове», — міністар замежных спраў Беларусі Ўладзімер Макей

Міністар замежных спраў Беларусі Ўладзімер Макей сказаў гэтыя словы ў інтэрвію Радыё Свабода: «Калі ты беларус, калі разумееш, што бяз мовы ня можа быць краіны — будзе і мова жыць, і краіна разьвівацца. Але нічога не павінна быць штучна, а павінна ісьці ад сэрца».

​16 чэрвеня ў яго заплянаваныя перамовы зь міністрам замежных спраў Чэскай Рэспублікі Лубамірам Зааралкам.

У будынку былога калегіюму езуітаў у Празе, дзе цяпер месьціцца Нацыянальная бібліятэка Чэхіі, адкрыліся дзьве мастацкія выставы, прысьвечаныя Скарыну.

Падчас адкрыцьця выставы беларускай графікі, у якой бяруць удзел мастакі Ўладзімер Вішнеўскі, Валеры Славук і Раман Сустаў, адбылася ўрачыстая перадача кніг шматтамовага факсымільнага праекту «Кніжная спадчына Скарыны», які выйшаў у Менску, у фонды Нацыянальнай Бібліятэкі Чэскай Рэспублікі — Славянскай бібліятэкі.

Другая мастацкая выстава арганізаваная Бібліятэкай Урублеўскіх Літоўскай акадэміі навук, Славянскай бібліятэкай Чэхіі і амбасадай Літвы ў Празе. Абедзьве выставы працягнуцца два тыдні.

Сэнсацыя: знойдзены другі партрэт Скарыны

На міжнародным сымпозіюме «Францішак Скарына і Прага», які праходзіць сёньня ў сталіцы Чэхіі, навуковец з Карлавага ўнівэрсытэту Пэтр Войт заявіў, што ідэнтыфікаваў другі партрэт беларускага асьветніка.

Скарына — гэта сучасны Джобс і Цукербэрг у адным

Беларускі першадрукар Францішак Скарына зрабіў кніжнае слова, а празь яго і ўсе веды чалавецтва, даступнымі для ўсіх і кожнага. Наватарству і арыгінальнаму падыходу беларускага асьветніка да кнігадрукаваньня прысьвечаная кніга «Францішак Скарына. Чалавек-легенда» беларускага дасьледчыка Алеся Сушы. Кніга выйшла ў сэрыі «Беларуская дзіцячая энцыкляпэдыя». Сёньня яе прэзэнтавалі на міжнародным сымпозіюме ў Празе — «Францішак Скарына і Прага».