У інфармацыйным цэнтры БелАЭС на просьбу Свабоды дазволіць доступ на тэрыторыю, каб пабачыць канструкцыю, адказалі, што існуе дакладна вызначаная працэдура наведваньня стратэгічнага аб’екту:
«Дасылайце запыт, будзе прызначаная праверка. Па яе выніках вам ці адмовяць, ці дадуць дазвол. Але правяраць будуць у любым выпадку. Іншых варыянтаў не прадугледжана, толькі праз папярэднюю заяву», — сказала супрацоўніца цэнтру.
Свабода ўжо даслала адпаведны запыт у дырэкцыю будаўніцтва АЭС і чакае ягонага разгляду.
Як вынікае з унутранага палажэньня РУП «БелАЭС», для допуску на будаўнічую пляцоўку прадстаўнікоў беларускіх мэдыяў за 14 дзён да плянаванага наведваньня неабходна накіраваць афіцыйны запыт з указаньнем пашпартных дадзеных, копіі пасьведчаньня аб акрэдытацыі СМІ, зьвесткі пра транспартны сродак, а таксама пляны рэпартажаў, артыкулаў, інтэрвію, сцэнарныя пляны фота-, кіна- і відэаздымкаў.
Для допуску прадстаўнікоў СМІ замежных краінаў аналягічныя дадзеныя маюць быць прадстаўленыя за месяц да меркаванага візыту.
Днямі зьявіліся паведамленьні, што 10 ліпеня падчас трэніровачнага ўсталёўваньня корпусу рэактара 330-тонны агрэгат сарваўся і ўпаў на зямлю. Некаторыя сьведкі здарэньня, якія пераказалі інцыдэнт мясцовым дэмакратычным актывістам, сьцьвярджаюць, што вышыня пры гэтым перавышала 10 мэтраў. Паведамлялася таксама, што месца надзвычайнага здарэньня ачэпленае і знаходзіцца пад пастаяннай і ўзмоцненай аховай. Аднак цягам двух тыдняў ні «Атамбудэкспарт», ні Міністэрства энэргетыкі Беларусі не давалі інфармацыі. Толькі калі інфармацыя набыла шырокі розгалас, Мінэнэрга дало зразумець: рашэньне пра далейшыя будаўніча-мантажныя працы будзе прымацца ў Маскве: "Беларускі бок і надалей будзе кіравацца неабходнасьцю безумоўнага гарантаваньня бясьпекі атамнай станцыі. Адпаведныя рашэньні што да працягу працаў будзе прымаць"Атамбудэкспарт«, — паведамілі ў ведамстве. У сваю чаргу, у «Атамбудэкспарце» запэўніваюць, што адбылася «звычайная штатная сытуацыя, як і на любой будоўлі» — пры правядзеньні такелажных прац па перасоўваньні корпусу рэактара з транспартнага на мантажны лажэмэнт усяго толькі сьцерлася фарба.
