Спадарыня Марыя: «А чаго мы ўжо можам чакаць? Ужо ўсё было. Будзем блытацца, канечне. Але добрасумленныя людзі заўсёды скажуць, што дала ня столькі, колькі трэба».
Спадарыня Тэрэза: «Мы пэнсію капейкамі атрымаем, а цэны кожны дзень падрастаюць. І зьберажэньняў няма ніякіх. Муж памёр, паставіла помнік — і жыву ад пэнсіі да пэнсіі. Бо надта шмат ідзе на лекі, дарагія ў нас лекі — часам дык і задумваюся, як дажыць да наступнае пэнсіі».
Спадар Валеры, палкоўнік у адстаўцы: «Чарговае абдурваньне народа. Гэта ж у нас ужо чацьвёрты раз адбудзецца. А потым інфляцыя зноў усё праглыне, і давядзецца гэтыя капейкі выкідаць. Трэба спачатку наладзіць эканоміку».
Аляксей, працуе на дзяржпрадпрыемстве: «Нам на дзяржаўнай працы трэба зашываць кішэні, каб не пагубіць капейкі... »
Сяргей, таксіст:
«Мадэрнізацыя таксомэтра абыдзецца каля двух мільёнаў, і гэта на кожнай таксоўцы. І гэта зноў грошы ў дзяржаўныя структуры з нашых кішэняў. Ну вось мы як быццам дэнамінацыі не праводзім, а павінны за гэта выкладваць такія грошы. Вось і думай... Дзяржаве трэба за нешта жыць, а нам, выходзіць, як хочаш...»
Алена, працуе ў рэклямнай фірме: «Нас чакаюць расходы, бо на фірме будуць пераўсталёўваць праграмы бухгальтарскія, і за гэта давядзецца плаціць. Але самае страшнае, што ўсе дамовы трэба перапісваць нанава. А найбольшая небясьпека — гэта калі зробіш памылкі пры разьліках з кліентамі. Думаю, што блытаніны не пазьбегнуць пры выпісваньні рахункаў».
Аліна, прадавачка ў «Эўраопце»: «Я папраўдзе хвалююся, бо працую толькі два месяцы і ў мяне яшчэ і з гэтымі грашыма часам праблемы ўзьнікаюць. Асабліва калі шмат людзей і пачынаюць падганяць. А пакуль прывыкнеш да новых грошай...»
Сьвятлана, індывідуальны прадпрымальнік: «Нам ужо казалі, што касавыя апараты будзем замяняць. А гэта грошы, прычым уласныя грошы. А продажы цяпер вельмі слабыя, ніхто не сьпяшаецца купляць, і так працуем са стратамі. Нядобрасумленныя гандляры напачатку пагрэюць рукі, асабліва на старых людзях, а такія заўсёды знойдуцца. Дый наагул бяз фокусаў тут не абыдзецца».
