Азэрбайджан у аднабаковым парадку спыняе ваенныя дзеяньні ў Нагорным Карабаху.
Пра гэта гаворыцца ў заяве на сайце міністэрства абароны Азэрбайджана. Рашэньне прынятае «з улікам зваротаў міжнародных структур і міралюбнай палітыкі, якая праводзіцца дзяржавай», — сказана на сайце.
Пры гэтым Азэрбайджан паабяцаў працягнуць «наступальныя апэрацыі з выкарыстаньнем усіх наяўных на ўзбраеньні сродкаў» у выпадку працягу «правакацыйных дзеяньняў» з боку Армэніі.
У паведамленьні гаворыцца, што азэрбайджанскія войскі прыступілі да «ўмацаваньня абароны вызваленых тэрыторый». Раней Азэрбайджан заявіў аб занятку некалькіх вышынь у Нагорным Карабаху. Раніцай 3 красавіка ўзброеныя сілы непрызнанай Нагорна-Карабахскай рэспублікі заявілі аб вяртаньні адной з вышынь.
