Падчас адкрыцьця вершы Міхася Стральцова ў перакладзе на свае мовы прачыталі гішпанка Анхэля Эсьпіноса, літовец Марыюс Бурокас і паляк Богдан Задура. Беларускую вэрсію вершаў зачытаў кіраўнік ПЭН-цэнтру Беларусі Андрэй Хадановіч.
Поруч з ПЭН-цэнтрам арганізацыяй фэстывалю займаўся Саюз беларускіх пісьменьнікаў. Яго старшыня Барыс Пятровіч адзначыў, што з гадамі прыхільнікаў творчасьці Міхася Стральцова становіцца больш і больш:
«Кажуць, што творца, адыходзячы ад нас і аддаляючыся ў часе, становіцца бліжэй. Кажуць, што зорка, якая аддаляецца ад нас, з гадамі становіцца толькі ярчэй. А некаторыя зоркі з часам успыхваюць звышярка. Так ня раз было ў гісторыі літаратуры. Так сталася зь Міхасём Стральцовым. З гадамі яго папулярнасьць толькі расьце ў Беларусі, а прыхільнікаў яго творчасьці становіцца больш. Усё больш людзей захапляюцца яго паэзіяй, прозай, эсэістыкай. І цяпер імя яго гучыць побач з клясыкамі Янкам Купалам, Якубам Коласам, Уладзімерам Караткевічам і Максімам Багдановічам. Гэта не выпадкова. Гэта тое, што робіць шчасьлівым лёс творцы. А Міхась Стральцоў зрабіў для гэтага ўсё, што мог — пакінуў нам выдатную спадчыну. Жыве наш фэстываль! Жыве паэзія Міхася Стральцова! Жыве Беларусь!»
На вечарыне прысутнічала ўдава Міхася Стральцова Алена Дзьмітрыеўна.
Літаратар і журналіст Міхась Скобла, які стаў укладальнікам збору выбраных твораў Міхася Стральцова, што выйшаў у сэрыі «Беларускі кнігазбор», распавёў гісторыю падрыхтоўкі выданьня — з дапамогай удавы пісьменьніка ўдалося знайсьці невядомы раней архіў, дзе знаходзіліся не друкаваныя раней лісты, вершы, пераклады. Сярод гэтых твораў — апошні верш Міхася Стральцова, які той напісаў за паўтара месяца да сьмерці.
Свае вершы ў гонар адкрыцьця фэстывалю прачыталі Ёнатан Бэрг з Ізраілю і Хінэмана Бэйкер з Новай Зэляндыі. Пераклады зрабілі Павал Касьцюкевіч і Марыйка Мартысевіч.
Адам Глобус, які зачытаў любімыя вершы з творчасьці Міхася Стральцова, вырашыў скарыстацца момантам і ўручыў сваю штогадовую прэмію «Залатая літара». Яе атрымала кніга выбраных твораў Міхася Стральцова. Паводле рашэньня Адама Глобуса прэмія дасталася Андрэю Хадановічу — як ініцыятару выданьня.
Фэстываль «Вершы на асфальце» працягнецца да 14 лютага. Падрабязную праграму можна пабачыць на сайце stralcou-fest.by.
