Першыя кадры зь Сьвятланай Алексіевіч.
Цяпер афіцыйна: "У сувязі з наяўнасьцю пэўных арганізацыйна-тэхнічных, фінансавых і прававых пытаньняў, Белтэлерадыёкампанія не плянавала набыцьцё правоў на прамую трансьляцыю цырымоніі ўручэньня Нобэлеўскай прэміі за 2015 год".
А ў хуткім часе ў швэдзкім Каралеўскім драматычным тэатры зорка Швэдзкага тэлебачаньня Лена Эндрэ возьме ўдзел у публічнай прэм’еры радыёп’есы паводле кнігі Сьвятланы Алексіевіч «Час сэканд-Хэнд».
«Літаратурная Беларусь» заглыбілася ў архіў «Саюзу беларускіх пісьменьнікаў», каб даведацца пра пачатак творчай дарогі будучай набэліянткі. Паглядзіце, як за яе ў 80-я змагаліся Алесь Адамовіч, Янка Брыль, Васіль Быкаў і іншыя. Разьвіцьцё тэмы — у выпуску перадачы «Вольная студыя» «Чаму Алексіевіч не прымалі ў Саюз пісьменьнікаў?»
А калі Алексіевіч наведала школу ў эмігранцкім прыгарадзе Стакгольму, пра яе казалі «Яна сьмелая. Вельмі сьмелая».
Тым часам прэзыдэнт Швэдзкага ПЭН-цэнтру казаў літаральна наступнае: «Такія пісьменьнікі, як Алексіевіч, ствараюць для нас новую мову».
Дарэчы, расейскія крытыкі назвалі Нобэлеўскую лекцыю Алексіевіч «пуставатай» і «вясковай прозай». Сама Алексіевіч у інтэрвію Euronews казала, што Нобэль беларускаму пісьменьніку стаў для расейцаў нечаканасьцю.
Некаторыя крытыкавалі Алексіевіч за тое, што ў нобэлеўскай лекцыі яна распавядала пра тое, за што атрымала прэмію, а не пра праблемы Беларусі, ды распавядала не па-беларуску. «Калі дапусьціць, што Сьвятлана Алексіевіч — таксама „рускі сьвет“, то дзякуй Богу. Хай такі „сьвет“ будзе, нам ад яго не адгарадзіцца, і няхай ён будзе такім, якая ёсьць Алексіевіч», — казаў Свабодзе пісьменьнік і паэт Уладзімер Някляеў. «Што, я мела крычаць „Жыве Беларусь“ і скакаць на кані?», — адказвала Алексіевіч на крытыку. У сёньняшняй прамове яна абяцала казаць пра Беларусь.