Пра зварот ЭАЭС да ЭЗ учора паведаміла ТАСС міністар па асноўных кірунках інтэграцыі і макраэканоміцы Эўразійскай эканамічнай камісіі Тацяна Валавая.
Паводле яе, рашэньне аб накіраваньні афіцыйнай прапановы ў камісію ЭЗ было прынятае 8 верасьня ў Горадні на сустрэчы кіраўнікоў урадаў саюзу, у які ўваходзяць Беларусь, Казахстан, Кіргізстан, Расея і Армэнія. Ліст быў перададзены ў сярэдзіне кастрычніка.
«Нам трэба вяртацца да ідэі стварэньня агульнай эканамічнай прасторы, і мы прапаноўваем пачаць гэты дыялёг», — сказала Валавая, падкрэсьліўшы, што ліст пакуль — толькі «пазыцыйны дакумэнт», гэта значыць, ён выказвае меркаваньне камісіі ЭАЭС.
Адказу на прапанову пакуль не паступіла.
«Мы зыходзім з таго, што ў той ці іншай форме мы адказ атрымаем. Адсутнасьць адказу — гэта таксама адказ. Як мы гаворым на працягу апошніх некалькіх гадоў, мы гатовыя да дыялёгу», — адзначыла Валавая.
Кіраўнік фонду Мізэса Яраслаў Раманчук лічыць, што стварэньне адзінай эканамічнай прасторы абсалютна немагчымае.
«Я думаю, хутчэй беларускі спадарожнік прыляціць на Марс зь нейкім прадстаўніком Адміністрацыі прэзыдэнта. У сытуацыі, калі ёсьць санкцыі ў дачыненьні да Расеі з-за канфлікту ва Ўкраіне, а таксама ўлічваючы паводзіны Расеі ў Сырыі, гэта выглядае проста недарэчнай піяр-акцыяй, якая ня будзе мець ніякага працягу. Таму тут гаворка не ідзе пра сур’ёзнасьць — гэта амаль геапалітычны жарт», — заявіў ён у інтэрвію Радыё Свабода.
«Навошта такія прапановы робяцца? Каб паказаць, што мы добрыя, а Эўразьвяз дрэнны. Што мы „за“ чатыры свабоды, якія дэкляруюцца і ў ЭЗ, і ў ЭАЭС, а яны „супраць“. Гэта проста барацьба, гульня за думкі перш за ўсё расейцаў, бо яны павінны ўпэўніцца ў думцы, што гэта не Расея такая дрэнная, гэта Эўразьвяз дрэнны. І нават руку дапамогі, якую мы ім працягваем, яны адкідаюць. Вось для гэтага такое і робіцца. Гэта такі пункт у інфармацыйнай вайне, які вельмі лягічна стасуецца да таго, што робіць Крэмль», — кажа Раманчук.
Палітоляг-міжнароднік Андрэй Фёдараў таксама лічыць стварэньне адзінай эканамічнай прасторы ЭАЭС і ЭЗ нерэальнай задачай.
«Думаю, што на сёньняшні дзень такой пэрспэктывы не існуе, бо мы ведаем, якія адносіны паміж Эўропай і Расеяй, якая, як вядома, зьяўляецца галоўным рухавіком эўразійскай эканамічнай прасторы. Я ня бачу магчымасьцей, каб нешта зьмянілася, пакуль ня зьменіцца істотна палітычная сытуацыя вакол Украіны», — адзначыў ён у інтэрвію Свабодзе.
Вядома, што ідэя «інтэграцыі інтэграцыяў» ад Лісабона да Ўладзівастоку часта агучваецца Аляксандрам Лукашэнкам. Чаму ў гэтым так зацікаўлены беларускі кіраўнік, Андрэй Фёдараў разумее, але ці сур’ёзна ён на гэта разьлічвае — сказаць цяжка.
«Зацікаўленасьць цалкам зразумелая, бо гэта адчыняе доступ і на эўрапейскія рынкі, і доступ у палітычным сэнсе. Але наколькі ён усур’ёз разьлічвае на гэта — ня ведаю», — кажа экспэрт.
