38 выданьняў антыўкраінскага зьместу забароненыя да ўвозу ва Ўкраіну фіскальнай службай гэтай краіны. Вялікую частку апублікаванага ўкраінскімі ўладамі сьпісу можна знайсьці на паліцах сталічнай кнігарні «Акадэмкніга».
Сярод прапанаваных паважанай крамай пазыцыяў — кнігі Аляксандра Севера «Бандера и бандеровщина», Льва Вяршыніна «Евромайдан. Кто уничтожил Украину», Сяргея Глазьева «Украинская катастрофа», зь дзясятак выданьняў лідэра расейскага руху «Антимайдан» Мікалая Старыкава і іншая падобная літаратура. Апроч таго, «Акадэмкніга» прапануе набыць выданьні, якія ня значацца ў сьпісе забароненых ва Ўкраіне, але маюць выразна антыўкраінскі зьмест. Напрыклад, кнігу Андрэя Каравулава «Геноцид русских на Украине» ці Ўладзіслава Шурыгіна — «Как воюют на Донбассе».
Намесьнік дырэктара кнігарні Сяргей Мікалаевіч Клімовіч даваць інфармацыю наконт пастаўшчыкоў падобнай літаратуры адмовіўся і прапанаваў прыйсьці на асабістую сустрэчу.
Паводле Клімовіча, пытаньне пра пастаўшчыкоў настолькі «дзіўнае», што — задаў ён рытарычнае пытаньне — «можа, вам яшчэ прадставіць інфармацыю пра наш таваразварот?»
Антыўкраінскія выданьні «Акадэмкніга» прапануе набыць і на сваім сайце.
Украінскія ўлады афіцыйна забаранілі іх «з мэтай прадухіліць ужываньне да грамадзян Украіны мэтадаў інфармацыйнай вайны і дэзынфармацыі, пашырэньня ідэалёгіі чалавеканенавісьніцтва, фашызму, ксэнафобіі і сэпаратызму, спыніць замах на тэрытарыяльную цэласнасьць і вызначаны Канстытуцыяй Украіны дзяржаўны лад».
Беларускім чытачам уся гэтая літаратура пакуль даступная. Палітоляг Павал Вусаў нагадвае, што гэта ня першы выпадак, калі антыўкраінскія кнігі трапляюць на беларускі рынак. Паводле яго, гэта сьведчыць пра вельмі кепскую сытуацыю з абаронай культурнай і палітычнай інфармацыйнай прасторы Беларусі.
«Беларусь — інтэгральная частка „русского мира“, расейскія інфармацыйныя, палітычныя, ідэалягічныя прапагандысцкія ўплывы тут не абмежаваныя, — кажа Вусаў. — Ідэя „русского мира“, прарасейскія погляды ў Беларусі фактычна дамінуюць. Ніякай альтэрнатывы для махровага расейскага шавінізму ў Беларусі няма».
Палітоляг лічыць, што беларускія ўлады амаль нічога ня робяць дзеля таго, каб перашкодзіць зьяўленьню такой літаратуры ў Беларусі.
«А нават і спрыяюць, — даводзіць Вусаў. — Бо пра гэта менавіта сьведчыць, што такія абсурдныя антыгістарычныя кніжкі зьяўляюцца ня недзе ў маргінальных крамах, а менавіта ў „Акадэмкнізе“. То бок залічваюцца ў акадэмічную літаратуру і фактычна разбураюць акадэмічную сьвядомасьць».
На фоне масавага ўплыву расейскай мэдыяпрапаганды на беларусаў такія кнігі наўрад ці могуць нанесьці вялікую шкоду, мяркуе палітоляг. Менавіта расейскія СМІ граюць асноўную дэструктыўную ролю ў разбурэньні беларускай нацыянальнай сьвядомасьці, і гэта нэгатыўна адаб’ецца ў пэрспэктыве.
«Мы ўжо бачым шырокі пласт насельніцтва, якое падтрымлівае дзеяньні Расеі ва Ўкраіне, якое падтрымлівае пазыцыю Расеі ў стасунках з Захадам. І фактычна гатовае здаць Беларусь дзеля мітычнай ідэі „русского мира“, — папярэджвае Павал Вусаў. — Я ўпэўнены, што беларусы самі па сабе не разумеюць, што такое „русский мир“. Але, задураныя расейскай прапагандай, гатовыя стаць больш расейцамі, чым самі расейцы. Гэта мысьленьне калянізаваных народаў, якія прагнуць быць „чысьцейшымі“, чым калянізатары».
«Беларусы вельмі ахвоча, „на ўра“ адмаўляюцца ад сваёй нацыянальнай ідэнтыфікацыі на карысьць абсалютна дэструктыўных мітаў, як „русский мир“, расейская новая імпэрыя ці расейскі псэўда-Савецкі Саюз», — заключае палітоляг.
Вялікі сьпіс антыўкраінскай літаратуры дагэтуль можна набыць і праз інтэрнэт-краму oz.by.
