ПАДЗЕІ ДНЯ:
Другая нядзеля Адвэнту. У Беларускім касьцёле – дзень малітвы за тых, хто дапамагае касьцёлу на Ўсходзе.
Менск. Маладыя Хрысьціянскія Дэмакраты запрашаюць на сустрэчу з былым кіраўніком Вярхоўнага Савету Беларусі, адным з падпісантаў пагадненьня ў Віскулях Станіславам Шушкевічам. Прэзэнтацыя беларускамоўнага выданьня кнігі Шушкевіча «Маё жыцьцё, крушэньне і адраджэньне СССР». Пачатак аб 11:00, Чарнышэўскага 3.
Прага. Беларуская імша ў царкве сьвятых Кузьмы і Дзям’яна. Адрас: Vyšehradská 49, Praha 2. Пачатак у 11:00.
Вільня. У Святатраецкай царкве адбудзецца беларуская імша. Адрас: Базыльянскія муры, Aušros Vartų gatvė, 9. Пачатак у 12:00
Менск. Літаратурна-музычная вандроўка да дня нараджэньня Максіма Багдановіча. Напрыканцы вандроўкі адбудзецца музычна-паэтычная вечарына з удзелам беларускіх паэтаў і музычных выканаўцаў Андрэя Хадановіча, Тацяны Матафонавай і іншых. Чакаюцца віктарына і іншыя сюрпрызы. Пачатак у 11:00 ад помніка паэту.
Уступае ў сілу закон «Аб унясеньні зьменаў у некаторыя законы Рэспублікі Беларусь у пытаньнях правядзеньня выбараў і рэфэрэндумаў».
Кіеў. На Майдане Незалежнасьці – Народнае веча. Пачатак – у 12:00.
У «Менск-Арэне» – канцэрт украінскага гурту «Океан Ельзи». Пачатак у 19:00.
У Гарадзенскім драмтэатры выступіць з канцэртам Натальля Немэн. Дачка сьпевака Чэслава Немэна, які паходзіць зь беларускай вёскі Васілішкі, прэзэнтуе як свае песьні, так і рэмэйкі з творчасьці бацькі. Пачатак а 19-й гадзіне.
Менск. Андрэй Макарэвіч зь «Песьнямі пра каханьне» выступіць у Беларускім музычным тэатры. Пачатак у 19:00.
Праваабарончы праект «ГейБеларусь» праводзіць у Менску чарговы зьезд.
ТАКСАМА Ў ГЭТЫ ДЗЕНЬ:
1958 – у Мадрыдзе з ініцыятывы Рады БНР пачалася трансьляцыя беларускіх радыёперадачаў гішпанскага радыё, якія рэдагаваў Янка Сурвіла. Вяшчаньне ішло да траўня 1965 году, у эфір выйшла больш за 2300 перадачаў.
1991 – у рэзыдэнцыі Віскулі ў Белавескай пушчы былі падпісаныя Белавескія пагадненьні. Кіраўнікі Беларусі, Расеі і Ўкраіны Шушкевіч, Ельцын і Краўчук афіцыйна дэнансавалі дагавор аб утварэньні СССР і ўтварылі Садружнасьць Незалежных Дзяржаваў.
1994 – празь нязгоду з курсам прэзыдэнта Лукашэнкі зь ягонай каманды афіцыйна сышоў Віктар Ганчар.
1999 – кіраўнікі Беларусі і Расеі Лукашэнка і Ельцын падпісалі дамову аб стварэньні так званай саюзнай дзяржавы Беларусі і Расеі.
У гэты дзень нарадзіліся:
65 да н.э. – Гарацый, рымскі паэт.
1914 – Часлаў Сіповіч, грэка-каталіцкі біскуп, актыўны дзяяч беларускай эміграцыі ў Вялікабрытаніі, заснавальнік Беларускае бібліятэкі і музэя імя Францішка Скарыны ў Лёндане.
У гэты дзень памерлі:
1937 – расстраляныя фальклярыст і кампазытар Антон Грыневіч, палітык і літаратуразнаўца Ігнат Дварчанін, а таксама яшчэ адзін дзяяч беларускага руху ў Заходняй Беларусі Язэп Гаўрылік. За сваю беларускую дзейнасьць на Віленшчыне Дварчанін і Гаўрылік былі арыштаваныя польскімі ўладамі і прысуджаныя да вялікіх тэрмінаў зьняволеньня, пасьля шляхам абмену палітвязьняў яны трапілі ў Савецкі Саюз, дзе іх і расстралялі.
ЦЫТАТА НА ПАМЯЦЬ:
«Падпісаньне саюзнай дамовы – гэта ня толькі сумная справа, гэта ўвогуле злачынства стагодзьдзя. Гэта, безумоўна, генацыд беларускай нацыі – канец яе гісторыі».
Васіль Быкаў
