ПАДЗЕІ ДНЯ
Менск. Беларуская хрысьціянская дэмакратыя і Маладыя хрысьціянскія дэмакраты праводзяць сумесную прэс-канфэрэнцыю, прысьвечаную пачатку кампаніі супраць гвалту і садызму ў беларускім грамадзтве ў дачыненьні да жывёл. Пачатак а 11.00. Офіс Партыі БНФ.
Менск. Мэмарыяльны музэй Якуба Коласа запрашае аматараў беларускай літаратуры на прэзэнтацыю новай кнігі Людмілы Рублеўскай «Рыфма коштам у жыцьцё...» Пачатак а 16.00.
Лунінец. У межах кампаніі «Будзьма беларусамі!» адбудуцца творчыя сустрэчы Вадзіма Жылко, Міколы Кандратава і Аляксея Нежаўца. У Лунінецкай раённай бібліятэцы (вул. Фрунзэ, 12) Мікола Кандратаў прэзэнтуе новую кнігу паэзіі «Кроплі дажджу», Вадзім Жылко пазнаёміць слухачоў з новымі выданьнямі лунінецкіх літаратараў, а бард Аляксей Нежавец прадставіць агульнай увазе свае новыя і ўжо знаёмыя песьні. Пачатак а 12:00.
Менск. Беларуска-літоўскія сустрэчы ўпершыню пройдуць на Катэдры гісторыі Беларусі старажытнага часу і сярэдніх вякоў гістарычнага факультэту БДУ (вул. Чырвонаармейская , 6 , аўд. 4). Пачатак у 18.00.
Менск. Прымаючы эстафэту ў Нацыянальнага гістарычнага музэю, галерэя твораў Леаніда Шчамялёва працягвае дэманстраваць унікальны фотапраект «Прыгожы фотаздымак мяжы ХIХ–ХХ стагодзьдзяў. Частка I. «Непатрэбнае сваяцтва». Адкрыцьцё а 18.00.
Менск. У рамках фэстывалю японскай культуры «Японская восень у Беларусі 2013» у Беларускім дзяржаўным унівэрсытэце культуры і мастацтваў (актавая заля) амбасада Японіі арганізуе дэманстрацыю японскай чайнай цырымоніі. Пачатак а 18.00.
ГЭТЫ ДЗЕНЬ У ГІСТОРЫІ
1368 – Тросьненская бітва паміж войскам ВКЛ на чале зь вялікім князем Альгердам і старажавым атрадам Маскоўскага княства. Назву бітва атрымала ад назвы ракі Тросны, левага прытоку ракі Нары непадалёк ад Масквы. Перамога адкрыла Альгерду шлях на Маскву, але трохдзённая аблога аказалася беспасьпяховай – за год да гэтага быў пабудаваны маскоўскі Крэмль.
1910 – у Менску адбылося ўрачыстае асьвячэньне касьцёлу сьвятых Сымона і Алены (Чырвонага касьцёлу).
1920 – разгортваецца Слуцкі збройны чын. У гэты дзень Рада Случчыны выдала дэклярацыю, у якой заклікала сялянства «на барацьбу за незалежную Беларусь у яе этнаграфічных межах».
1926 – у Віцебску створаны другі Беларускі дзяржаўны тэатар (БДТ-2) – цяпер Нацыянальны акадэмічны драматычны тэатар імя Якуба Коласа.
1990 – Менскі касьцёл сьвятых Сымона і Алены пасьля 46-гадовага перапынку вернуты католікам. Біскуп Тадэвуш Кандрусевіч адслужыў урачыстую імшу.
У гэты дзень нарадзіліся:
1694 – Франсуа-Мары Вальтэр, францускі філёзаф.
1874 – Уінстан Чэрчыль, брытанскі палітычны дзяяч.
1921 – Янка Юхнавец, беларускі паэт, пісьменьнік, драматург, мастак, скульптар.
1936 – Марыя Захарэвіч, беларуская акторка тэатру і кіно.
1957 – Мірон Хадакоўскі, гайнаўскі арцыбіскуп, брыгадны генэрал і праваслаўны ардынары польскага войска.
У гэты дзень памерлі:
1790 – Караль Станіслаў Радзівіл «Пане Каханку», ваявода віленскі, староста львоўскі. Ён быў найбольш заможным магнатам Рэчы Паспалітай другой паловы XVIII стагодзьдзя і адным з найбагацейшых прадстаўнікоў арыстакратыі ў Эўропе. Ягоная лятыфундыя ахоплівала 16 местаў і 683 вёскі, а вакол асобы князя вілося шмат легендаў. Жыў у Нясьвіжы.
1830 – Ян Сьнядэцкі, беларускі астраном, матэматык, філёзаф.
1839 – Матэвуш Ліпскі, грэка-, а пасьля рыма-каталіцкі дзяяч, біскуп.
ЁСЬЦЬ НАГОДА
Сусьветны дзень вітаньняў
Сусьветны дзень тэлебачаньня
Сусьветны дзень філязофіі
Міжнародны дзень адмовы ад курэньня
Beaujolais Nouveau або Новы вінны год
Саміт Кітай-ЭЗ у Пэкіне
Візыт эўракамісара Штэфана Фюле ў Кіеў
ЦЫТАТА НА ПАМЯЦЬ
«У момэнт самаадзначэньня ўсіх народаў і барацьбы іх за сваю самастойнасьць і свабоду Беларусі Рада Случчыны, выпаўняючы волю сялянства, паслаўшага яе і даверыўшага ёй абарону незалежнасьці нашай Бацькаўшчыны Беларусі, падымае сьцяг барацьбы за свабодную незалежную Беларусь...»
Дэклярацыя Рады Случчыны, 1920 год
