Гайдукевіч зноў зьбіраецца балятавацца ў прэзыдэнты

За гэта прагаласавалі ўсе 175 дэлегатаў пазачарговага партыйнага зьезду, які прайшоў сёньня ў канфэрэнц-залі менскага гатэля «Юбілейны».

Сёньняшняе вылучэньне з гледзішча беларускага заканадаўства чыста фармальнае, паколькі афіцыйнае вылучэньне адбываецца толькі пасьля таго, як абвяшчаецца выбарчая кампанія. Пра тое, што вымушае Сяргея Гайдукевіча сьпяшацца, ён распавёў з трыбуны зьезду:

«Сёньня да пачатку прэзыдэнцкай кампаніі застаецца паўтара года. На пачатку 2015 году разгортваецца вялікая прэзыдэнцкая гонка. А што такое паўтара году? Гэта нішто».

Дзеяньні Сяргея Гайдукевіча можна зразумець, у іх ёсьць пэўны прагматызм, лічыць палітоляг Аляксандар Класкоўскі:

«Любому палітыку, любому дзеячу выгадна засьвяціцца. Бо гэтае імя падхопліваюць мэдыі, так ці інакш яно мільгае. Хай нават сабе будуць крытыкаваць, пасьмейвацца, казаць, што гэта фальшывая фігура і г. д. Але любы піяр — гэта піяр. І таму нейкія працэнты галасоў выбарцаў і такім чынам патэнцыйна зарабляюцца».

Сяргей Гайдукевіч выказаў меркаваньне, што выбары ў 2015 годзе будуць вельмі адрозьнівацца ад усіх папярэдніх, асабліва ад апошніх:

«Адзінага кандыдата ад дэмакратычных сілаў ня будзе. Яму проста няма адкуль узяцца. А калі б ён быў, дык яго патрэбна было абіраць яшчэ ўчора. І таму, што мы маем на сёньняшні дзень? Два асноўныя кандыдаты — дзейны прэзыдэнт і прадстаўнік ЛДП».

Пасьля, праўда, спадар Гайдукевіч дадаў, што як магчымы варыянт ён разглядае трэцяга кандыдата, які, на ягоную думку, можа прэзэнтаваць Беларускі народны фронт. Што тычыцца Ўладзімера Някляева і Аляксандра Мілінкевіча, то лідэр ЛДП згадаў, што ў 2015 годзе ім будзе пад 70. А вось сябе ён параўнаў з Аляксандрам Лукашэнкам: абодва нарадзіліся ў адзін год з розьніцай усяго ў 10 дзён.

Аляксандар Класкоўскі кажа, што сюжэт новых прэзыдэнцкіх выбараў залежыць ад шэрагу яшчэ ня вызначаных чыньнікаў:

«Я магу зазначыць, што ніколі і не было адзінага кандыдата ад апазыцыі ў строга фармальным такім сэнсе і на ўсіх папярэдніх выбарах. Таму верагодна, што сапраўды на выбарах-2015 у бюлетэнях будзе толькі некалькі прозьвішчаў. Адзінае, што апазыцыя, напэўна, пастараецца зрабіць нейкія высновы з таго параду кандыдатаў, з россыпу супернікаў Лукашэнкі на выбарах-2010, калі гэта прывяло да поўнага бязладзьдзя, да анархіі на Плошчы. І напэўна, усё ж такі пэўныя высновы будуць зробленыя».

Сяргей Гайдукевіч удзельнічаў у прэзыдэнцкіх выбарах 2001 году, дзе атрымаў 2,48% галасоў выбарцаў і выбарах 2006 году — 3,5%. На выбарах 2010 году зьняў сваю кандыдатуру.