Андрэя Саньнікава будуць этапаваць з Магілёва ў Віцебск
Былому кандыдату на прэзыдэнта і палітвязьню Андрэю Саньнікаву забараняюць сустрэчу з адвакатам. Экс-кандыдату на прэзыдэнта Міколу Статкевічу адмаўляюць у мэдычнай дапамозе. Палітвязьня Зьмітра Бандарэнку прызналі прыдатным для працы на аўтамабілі.
Да Андрэя Саньнікава ў Магілёўскай турме адвакат дапушчаны ня будзе. Пра гэта жонцы Андрэя Саньнікава, журналістцы Ірыне Халіп паведаміў выканаўца абавязкаў кіраўніка Дэпартамэнту выкананьня пакараньняў Працэнка. Андрэй Саньнікаў у Магілёве знаходзіцца этапам з бабруйскай турмы ў перасыльную турму ў Віцебску.
Ірына Халіп: «Ён мне сказаў, што пакуль ён будзе ў магілёўскай турме, адвакаты да яго дапушчаныя ня будуць. Бо ў нас унутраныя інструкцыі супярэчаць Канстытуцыі, але прызнаюцца галоўнымі. Як быццам бы тыя, хто знаходзіцца ў перасыльнай турме, ня маюць права на юрыдычную абарону. Аказваецца, калі мінулым разам у Магілёве да Андрэя дапускалі адваката, то гэта было парушэньне. Я ня ведаю, колькі Андрэй будзе ў магілёўскай турме, колькі потым ён будзе ў віцебскай турме, куды яго павязуць з Магілёва. Але пакуль ён не апынецца ў калёніі, ён ня можа разьлічваць на сустрэчу са сваімі адвакатамі і на юрыдычную дапамогу. Пераводзяць яго таксама з надуманых прычын, а насамрэч тут штосьці іншае — глыбока схаванае. Вядома, што ніякія законы тут не працуюць».
Былому кандыдату на прэзыдэнта Міколу Статкевічу ў шклоўскай турме адмаўляюць у мэдычнай дапамозе, а таксама надалей перашкаджаюць пабрацца шлюбам з Марынай Адамовіч.
Статкевічу адмаўляюць у біяхімічным аналізе крыві з надуманых прычын. Я гэта расцэньваю як сьвядомае неаказаньне мэдычнай дапамогі.
Марына Адамовіч: «Самае істотнае тое, што Статкевічу, у якога ўзьніклі праблемы з сэрцам яшчэ пасьля галадоўкі ў СІЗА КДБ, адмаўляюць у біяхімічным аналізе крыві з надуманых прычын. Я гэта расцэньваю як сьвядомае неаказаньне мэдычнай дапамогі. А другое — я атрымала адказ на свае скаргі, у якім гаворыцца, што адміністрацыя павінна мець доказ таго, што папярэдні ягоны шлюб скасаваны. Адвакат сам завёз гэтыя копіі, на што начальнік сказаў, што арыгінальныя дакумэнты ён павінен атрымаць асабіста і асабіста занесьці ў ЗАГС. Я адмыслова зьезьдзіла ў ЗАГС, дзе мне паведамілі, што шлюбы рэгіструюцца ў іншым парадку».
Палітвязьня Зьмітра Бандарэнку лекары магілёўскай турмы прызналі прыдатным, каб працаваць за рулём аўтамабіля, паведаміла жонка Зьмітра Бандарэнкі Вольга:
«Яго маглі перавесьці ізноў у атрад. А пасьля кансультацыі магілёўскіх мэдыкаў, што ён можа вадзіць машыну, яго могуць і прымушаць працаваць, а ён ня зможа. Гэткім чынам будуць ціснуць на здароўе. Ён нават дагэтуль дрэнна ходзіць, кульгае, ня можа ціснуць на пэдаль. І калі яму дазволяць садзіцца, яму можна будзе сядзець ня больш за 15 хвілін. Па-мойму, ён ужо ніколі ня будзе вадзіць машыну. А тое, што творыцца з Андрэем Саньнікавым, што яго ізноў перавялі, што да яго не дапускаюць адваката, што на ўсіх ціснуць, — я не выключаю, што нейкім спосабам будуць ціснуць і на майго мужа. Таму вельмі хвалююся».
Паводле Вольгі Бандарэнкі, яна прыкладае намаганьні, каб Зьмітра Бандарэнку наведаў адвакат.
Андрэй Саньнікаў
Андрэй Саньнікаў
Нарадзіўся ў Менску 8 сакавіка 1954 года. Скончыў Менскі дзяржаўны інстытут замежных моваў, Дыпляматычную акадэмію Міністэрства замежных справаў СССР у Маскве. Валодае чатырма мовамі. Працаваў у Таварыстве дружбы з замежнымі краінамі, у сакратарыяце ААН у Нью-Йорку, быў дарадцам прадстаўніцтва Рэспублікі Беларусь у Швайцарыі.
У 1995-1996 гг. — намесьнік міністра замежных спраў Беларусі. Пакінуў гэтую пасаду ў лістападзе 1996 год на знак пратэсту супраць правядзеньня рэферэндуму. У лістападзе 1997 году стаў стваральнікам і міжнародным каардынатарам грамадзянскай ініцыятывы «Хартыя’97».
У 2008 годзе ініцыяваў грамадзянскую кампанію «Эўрапейская Беларусь».
Ляўрэат міжнароднай прэміі імя Бруна Крайскага ў галіне абароны правоў чалавека (2005 г.).
Кандыдат у прэзыдэнты Рэспублікі Беларусь на выбарах-2010.
Мікола Статкевіч
12 жніўня 1956 году Нарадзіўся ў вёсцы Лядна Слуцкага раёну Менскай вобласьці ў сям'і настаўнікаў.
1978 Скончыў Менскую вышэйшую інжынэрную зэнітна-ракетную вучэльню.
1986 Абараніў кандыдацкую дысэртацыю.
Працаваў выкладчыкам Менскай вышэйшай інжынэрнай зэнітна-ракетнай вучэльні.
Люты 1991 На знак пратэсту супраць падзей у Вільні выйшаў з КПСС.
1991 Сябра Цэнтральнай рады і выканаўчага камітэту Беларускай сацыял-дэмакратычнай партыі (Народная Грамада).
1995 Старшыня БСДП (НГ).
1991-1995 Стваральнік і кіраўнік Беларускага згуртаваньня вайскоўцаў.
2000 Удзельнічаў у выбарах у Палату прадстаўнікоў.
2005 Асуджаны на тры гады абмежаваньня волі за арганізацыю 18-19 кастрычніка 2004 году ў Менску вулічнай акцыі супраць афіцыйных вынікаў парлямэнцкіх выбараў і рэфэрэндуму. Па амністыі тэрмін абмежаваньня волі быў скарочаны на год.
Кіраўнік аргкамітэту ў справе стварэньня Беларускай сацыял-дэмакратычнай партыі (Народная Грамада).
2010 Статкевіч вылучаўся кандыдатам у прэзыдэнты. Пасьля пратэстаў на Плошчы яго арыштавалі і затым асудзілі да 6 гадоў з адбыцьцём тэрміну пакараньня на падставе ч. 1 арт. 293 Крымінальнага кодэксу (арганізацыя масавых беспарадкаў, якія суправаджаліся гвалтам над асобай, пагромамі, падпаламі, зьнішчэньнем маёмасьці і ўзброеным супрацівам прадстаўнікам улады). З тэрміну ён адседзеў 5 гадоў, катэгарычна адмовіўся пісаць на імя Лукашэнкі прашэньне аб памілаваньні, аднак усё адно выйшаў на волю пасьля ўказу апошняга.
2011 Адбываючы тэрмін зьняволеньня, Мікола Статкевіч узяў шлюб з Марынай Адамовіч. Дзьве ягоныя дачкі ад першага шлюбу жывуць у Нямеччыне.
2017 Статкевіча затрымліваюць і зьмяшчаюць у СІЗА перад Днём Волі.
31 траўня 2020 Статкевіча затрымалі па дарозе на выбарчы пікет Сьвятланы Ціханоўскай. Спачатку яго пакаралі адміністрацыйным арыштам на 15 сутак, да якіх пасьля дадалося яшчэ столькі ж. Аднак па адбыцьці гэтага тэрміну палітыка ня вызвалілі, а перавялі ў СІЗА № 1 Менска і выставілі абвінавачаньне паводле крымінальнага артыкулу 342. Ён зноў адмаўляецца пісаць Лукашэнку прашэньне на памілаваньне, называе яго ўзурпатарам і дыктатарам, вітае канвой на закрытым судзе ў Гомлі нацыянальным воклічам «Жыве Беларусь!».
Зьміцер Бандарэнка
Зьміцер Бандарэнка
Грамадзкі актывіст, сябра ГА «БАЖ». Нарадзіўся ў Менску 28 верасьня 1963 году.
У 1984 г. скончыў Інстытут фізычнай культуры.
У 1995–1996 гг. працаваў на незалежным Радыё 101.2 FM, зачыненым уладамі.
Адзін з заснавальнікаў грамадзянскай ініцыятывы «Хартыя-97», каардынатар грамадзянскай кампаніі «Эўрапейская Беларусь».
У часе прэзыдэнцкіх выбараў 2010 г. быў актывістам штабу кандыдата на прэзыдэнта Андрэя Саньнікава. Быў арыштаваны 20 сьнежня ва ўласнай кватэры і зьмешчаны ў СІЗА КДБ. Першапачаткова ў дачыненьні да яго было высунутае абвінавачваньне па арт. 293 КК (масавыя непарадкі), які прадугледжвае пакараньне да 15 гадоў пазбаўленьня волі, аднак 4 красавіка яно было перакваліфікавана на больш мяккае.
Зьміцер Бандарэнка абвінавачваецца па ч. 1 артыкулу 342 Крымінальнага кодэксу (арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх). Артыкул прадугледжвае пакараньне штрафам, або арыштам на тэрмін да шасьці месяцаў, ці абмежаваньнем волі на тэрмін да трох гадоў, або пазбаўленьнем волі на той жа тэрмін.
Нарадзіўся ў Менску 8 сакавіка 1954 года. Скончыў Менскі дзяржаўны інстытут замежных моваў, Дыпляматычную акадэмію Міністэрства замежных справаў СССР у Маскве. Валодае чатырма мовамі. Працаваў у Таварыстве дружбы з замежнымі краінамі, у сакратарыяце ААН у Нью-Йорку, быў дарадцам прадстаўніцтва Рэспублікі Беларусь у Швайцарыі.
Грамадзкі актывіст, сябра ГА «БАЖ». Нарадзіўся ў Менску 28 верасьня 1963 году.Статкевічу адмаўляюць у біяхімічным аналізе крыві з надуманых прычын. Я гэта расцэньваю як сьвядомае неаказаньне мэдычнай дапамогі.
