Як паведамілі ў МЗС у Менску, замежнапалітычнае ведамства Беларусі з задавальненьнем успрыняла вызваленьне беларускага грамадзяніна Міхаіла Петухова, а таксама чатырох іншых сябраў экіпажу Іл-76 — грамадзянаў Казахстану.
Цягам апошніх некалькіх дзён у Бангкоку знаходзіўся консул Беларусі ў Віетнаме, які аказваў беларускаму пілёту неабходную консульска-прававую дапамогу.
Афіцыйнае паведамленьне беларускага МЗС было зроблена папаўдні, пасьля таго як працэдура дэпартацыі Міхаіла Петухова была завершаная і ён пакінуў Тайлянд.
Тайскі прэм’ер Апхісіт Вэтчачыва заявіў напярэдадні, што яго чыноўнікі ўжо ўзгаднілі з урадоўцамі Беларусі і Казахстану дэталі дэпартацыі. Вэтчачыва таксама паведаміў, што далейшае расьсьледаваньне па справе Іл-76 будзе працягвацца на радзіме пілётаў.
11 сьнежня ў часе праверкі самалёта Іл-76, які ляцеў рэйсам з Альжыру ва Ўкраіну і рабіў тэхнічны прыпынак у бангкоцкім аэрапорце Don Mueang, на борце машыны і ў 145 кантэйнэрах былі знойдзеныя 35 тонаў зброі.
Як пішуць тайскія выданьні, ператрус самалёта быў ініцыяваны органамі тайскай выведкі на падставе інфармацыі з ЗША.
Улады Тайлянду затрымалі грамадзяніна Беларусі Міхаіла Петухова, а таксама грамадзянаў Казахстану Ільяса Ісакава, Віктара Абдулаева, Аляксандра Зрыбнева і Віталя Шумкова.
Паводле сёньняшніх публікацыяў, мяркуецца, што самалёт Іл-76 і яго груз будуць канфіскаваныя.
11 лютага пракуратура Тайлянду вынесла вэрдыкт не выстаўляць абвінавачаньні пілётам.
Паводле некаторых тайскіх крыніцаў, рашэньне магло быць прынятае на просьбу мясцовага ўраду, які ў сваю чаргу пайшоў насустрач кіраўніцтву Беларусі і Казахстану. Урады гэтых краін выказалі жаданьне правесьці самастойнае расьсьледаваньне адносна сваіх грамадзянаў.
