ТО ВОБЛАЧНА...
...то сонечна, то ветрана, то зацішна. Тэмпэратура: -14 — -4.
НЕ ПРАХОДЗЬЦЕ МІМА:
У Першамайскім судзе Менску разглядаюць пазоў Віталя Рамашэўскага і Паўла Севярынца супраць БТ за паклёп.
У офісе Аб’яднанай Грамадзянскай партыі прэзэнтуюць чарговы зборнік "Хроніка парушэньняў правоў чалавека ў Беларусі". Пачатак: 13.00.
ТАКСАМА Ў ГЭТЫ ДЗЕНЬ:
У 1946 нарадзіўся брытанскі гітарыст, сьпявак і кампазытар Сыд Барэт, заснавальнік і першы лідэр "Пінк Флойд", аднаго з найбольш славутых гуртоў у гісторыі рок-музыкі. Барэт пакінуў гурт у 1968, калі ягоныя экспэрымэнты з наркотыкамі давялі яго да псыхічнага расстройства. Барэт памёр у забыцьці ў 2006.
У 1975 памёр Юрка Віцьбіч, беларускі пісьменьнік, дзеяч беларускай эміграцыі (нар. 1905).
У 2004 у Нью-Ёрку памёр беларускі паэт Янка Юхнавец (нар. 1921). Атрымаўшы юрыдычную адукацыю ў Нямеччыне, Юхнавец з канца 1950-х жыў у ЗША. Выдаў зборнікі паэзіі “Шорах моўкнасьці”, “Новая элегія”, “Калюмбы”.
ЁСЬЦЬ НАГОДА:
Куцьця паводле старога стылю.
МІНУС 365:
Год таму на сайце Свабоды: "Каляды, якія мы забываем".
ЦЫТАТА НА ПАМЯЦЬ:
"Крытык мой, ты не ўзьнясеш мяне
да лёту птушак у паднябёсах.
Паэтычнай шумнасьці ў воддалях Радзімы
ня было.
Хто яе паслухае на чужыне?"
Янка Юхнавец
