Выйшла восем аўдыёкніг Караткевіча за раз

Адразу восем аўдыёдыскаў з запісамі твораў Уладзімера Караткевіча, запакаваных у адзін плястыкавы куфэрак, выйшлі ў сьвет. Усе творы гучаць у выкананьні знанага беларускага майстра мастацкага чытаньня Андрэя Каляды.

На дысках — раманы “Каласы пад сярпом тваім”, “Хрыстос прызямліўся ў Гародні”, “Чорны замак Альшанскі”, аповесьць“Дзікае паляваньне караля Стаха” і яшчэ шмат якія празаічныя і паэтычныя творы пісьменьніка.

Агульны час гучаньня — сто дваццаць з паловай гадзінаў.

Андрэй Каляда правёў у студыі з гукарэжысэрам Алесем Калошам, чытаючы Караткевіча, амаль год. А задумаў выдаць любімыя творы любімага пісьменьніка нашмат раней.

“Гэта даўно недзе ўнутры высьпявала. Але дасьпела цяпер, калі я пачаў з Алесем Калошам працаваць. Ён увогуле хацеў, каб я запісаў анталёгію Караткевіча. Ну, але на такое, можа, яшчэ творчых маіх сіл хапіла б, а вось каб гэта ўсё зрабіць, выдаць, то не. Таму што і гэты зборнік дыскаў, каб ня грант, то я ня змог бы выдаць”.

Выданьне зьявілася дзякуючы новай грамадзкай ініцыятыве “Мова”, якую падтрымалі некалькі замежных фондаў. Наклад зборніка дыскаў Караткевіча — трыста асобнікаў. Прадавацца яны, кажа спадар Каляда, ня будуць.

“Распаўсюджваецца толькі ў адукацыйных мэтах. Усё пойдзе толькі па бібліятэках — абавязкова. І гэта я буду сам трымаць на кантролі. І гэта такая была ўмова, калі дамаўляліся з фундатарамі на гэтае выданьне”.

Аднымі зь першых пачуюць творы Ўладзімера Караткевіча ў выкананьні Андрэя Каляды аршанцы. Сёньня адзін зь асобнікаў зборніка выдаўцы перадалі на радзіму пісьменьніка ў Літаратурны музэй ягонага імя. У нашых слухачоў таксама ёсьць магчымасьць пачуць адзін з запісаў. Прапануем паслухаць у выкананьні Андрэя Каляды верш Уладзімера Караткевіча “Мова”.