Апошнім часам узмацніўся ціск на іх з боку праваахоўных органаў. За мяжой апазыцыйныя актывісты папрасілі палітычнага прытулку.
Віктар Падчыненкаў шукаў працы больш за месяц, але яму паўсюль адмаўлялі. На ўтрыманьні ў яго двое дзетак і жонка, якая таксама не працуе.
Наша радыё распавядала, як на наступны дзень пасьля выбараў дырэктар прыватнай мэблевай фірмы звольніў Віктара Падчыненкава з працы, спаслаўшыся на тое, што гэтага ад яго патрабавалі прадстаўнікі ўлады.
Пра тое, што яны едуць прасіць палітычнага прытулку, уцекачы прызналіся самі перад ад’ездам кіраўніку абласной арганізацыі АГП Юр’ю Істоміну.
Віктар Падчыненкаў з Антвэрпэна ўжо зьвязваўся зь сям’ёй. Ягоная жонка Яўгенія сказала, што ў Віктара пакуль усё добра. Я запытаўся яе — чаму ён наважыўся на такі крок?
Яўгенія Падчыненкава: “Мы ўжо проста стаміліся тут змагацца. Ён ніяк ня мог знайсьці нармальнай працы. Мы ўвесь час перабіваліся, летам наагул жылі напаўгалодныя. Ладна, я пакуль не магу пайсьці працаваць, бо дачка малая, а яго ж нікуды не прымалі, ён жа мэблю зьбіраў”.
Уладзімер Ларын цяпер у Амстэрдаме. У Горадні засталася жонка, яны нядаўна пабраліся шлюбам і пакуль ня маюць дзетак. Тацяна Ларына кажа, што Валодзя таксама абхадзіў увесь горад, але на працу яго так нікуды і не ўзялі. А апошнім часам пачалі мацней ціснуць праваахоўныя органы.
Тацяна Ларына: “Выклікі ў КДБ, міліцыю, нейкія тэлефанаваньні, запалохваньні...”
Кіраўнік абласной арганізацыі АГП Юры Істомін з разуменьнем успрыняў іх рашэньне зьехаць зь Беларусі, паколькі бачыў, што ягоныя калегі па партыі не маглі наладзіць тут нармальнага жыцьця для сябе й сваіх сем’яў з палітычных прычынаў.
Істомін: “У апошнія тыдні актывізаваліся супрацоўнікі праваахоўных органаў, найперш КДБ. Яны неаднаразова выклікалі й Падчыненкава, і Ларына. Я думаю, што пасьля тых размоваў, якія яны вялі праз тэлефон, хлопцы й прынялі рашэньне тэрмінова зьехаць і папрасіць палітычнага прытулку”.
Сёлета паўторна папрасіў палітычнага прытулку ў Чэхіі актывіст беларускай апазыцыі Аляксей Шыдлоўскі. Упершыню ён рабіў такую спробу на пачатку лютага, але тады МЗС Чэхіі адмовіла Шыдлоўскаму, бо ў пашпарце ў яго была літоўская віза, больш працяглая, чым чэская. Пасьля высылкі актывіст не вяртаўся ў Беларусь, а жыў ва Ўкраіне. Гэтым разам Аляксей Шыдлоўскі спадзяецца на станоўчы вынік.
Яшчэ раней пакінуў Беларусь журналіст газэты “Народная воля” Аляксандар Сіліч. У Лёндан перабралася незалежная беларуская журналістка Вольга Бірукова. Ва Ўкраіне робіць фэрмэрам былы дэпутат Вярхоўнага Савету ХІІІ скліканьня Ўладзімер Кудзінаў. У Польшчы цяпер жыве бізнэсовец і былы дэпутат Вярхоўнага Савету ХІІІ скліканьня Валеры Кругавы.
