Людміла Гразнова балятуецца ў 110-й Партызанскай акрузе. На пытаньне, чым яна займаецца сёньня, кандыдатка ў дэпутаты адказвае:
“Чытаю вельмі добрыя тэксты нашых палітолягаў, культуролягаў, аналітыкаў. Захапляюся іх словам. Гэта мне патрэбна ня толькі сёньня — перад выступам па радыё і тэлебачаньні. Гэта мне патрэбна штомесяц, таму што гэта прачышчае мазгі. Гэта ўсталёўвае пэўную сыстэму”.
Ісьці сёньня да выбарцаў спадарыня Гразнова не зьбіраецца:
“Да выбарцаў я пайду на гэтым тыдні, калі будуць гатовыя мае ўлёткі. Зь імі выйшла затрымка, бо іх друкуюць у Слуцку, а ня ў Менску. Я сама буду хадзіць, раздаваць улёткі, сустракацца такім чынам з выбарцамі”.
Сустаршыня АДС Сяргей Калякін зарэгістраваны кандыдатам у дэпутаты ў 106-й Коласаўскай акрузе. Сёньня ў ягоных плянах і сустрэчы з выбарцамі:
“Мы кожны дзень сустракаемся з выбарцамі. Я і ў выходныя дні праводзіў сустрэчы. Выглядае гэта як пікеты ў дварах, на вуліцах. Стаўленьне да нас, дарэчы, вельмі-вельмі добрае. Ёсьць, канечне, асобныя людзі зь іншымі поглядамі. Але ў цэлым ставяцца вельмі добра”.
Сяргей Калякін кажа, што ягоная ініцыятыўная група разгортвае пікеты ў розных месцах:
“Мы працуем мабільна. Няма сэнсу стаяць увесь час на адным месцы. Таму рухаемся па дварах, стаім каля крамаў, пошты і г.д.”
Яшчэ адзін сустаршыня АДС — Анатоль Лябедзька балятуецца ў дэпутаты па суседняй, 105-й Старавіленскай акрузе. Ён кажа, што дагэтуль, як і некаторыя ягоныя паплечнікі, улётак ня мае:
“Мы канчаткова вызначыліся зь месцам, дзе іх будзем друкаваць. Зрабілі макеты. І сёньня дастаўляем дамовы ў фінансавыя аддзелы выканкамаў Менску, каб пералічыць грошы і атрымаць прадукцыю”.
Але сёньня ўвечары кандыдат у дэпутаты Лябедзька ўсё ж пабачыцца з выбарцамі:
“Сёньня мы з маладымі калегамі панясем лісты падзякі тым выбарцам, якія падтрымалі нас і паставілі свае подпісы для рэгістрацыі нас кандыдатамі ў дэпутаты”.
Кандыдат у дэпутаты па 104-й Кальварыйскай выбарчай акрузе Ігар Рынкевіч кажа, што сёньняшні дзень для яго стаў надзвычай насычаным:
“Канчаткова быў узгоднены варыянт макету маёй улёткі. Я скарыстаў дзяржаўныя грошы, якія даюцца кандыдатам у дэпутаты на агітацыю. Сёньня я таксама быў у рэдакцыі газэты “Рэспубліка”, дзе мне паведамілі, што 11 верасьня будзе надрукаваная мая перадвыбарчая праграма.
Акрамя гэтага, сёньня мне трэба рыхтавацца да заўтрашняга запісу свайго звароту на тэлеканале “Лад”.
