Ацэньваючы заяву прэзыдэнта Расеі Ўладзіміра Пуціна пра намер разьмясьціць на тэрыторыі Беларусі ядзерную зброю, Рада БНР убачыла ў гэтым намеры «поўную залежнасьць Лукашэнкі ад Крамля» і фіксацыю разрыву «інтарэсаў Лукашэнкі і памкненьняў беларускага народку, які яшчэ ў 1990 годзе ў Дэклярацыі аб дзяржаўным сувэрэнітэце выказаў намер дамагчыся бязьядзернага статусу краіны».
У заяве Рада БНР зьвяртае ўвагу, што верагодная «наяўнасьць расейскіх ядзерных боегаловак стварае рэальную пагрозу як для суседніх краінаў — Украіны, Польшчы, Літвы і Латвіі, гэтак і для самога беларускага народа, паколькі робіць тэрыторыю краіны практычна гарантаванай мішэньню для ядзернага ўдару».
«Беларусь, захоўваючы фармальныя прыкметы незалежнасьці, дэ-факта знаходзіцца пад палітычнай, эканамічнай і культурнай акупацыяй Масквы, пры якой пад пагрозу зьнікненьня пастаўленыя беларусы як нацыя. Разьмяшчаючы на тэрыторыі Беларусі ядзерную зброю, Пуцін ставіць беларускі народ цяпер ужо і пад пагрозу фізычнага існаваньня, — гаворыцца ў заяве.
ГЛЯДЗІЦЕ ТАКСАМА: Мішэнь для ядзернага ўдару, «чырвоны тэлефон» Шушкевіча і закрытае пасяджэньне парлямэнту. 15 фактаў пра вывад ядзернай зброі зь БеларусіТаксама нагадваецца, што «у часы максымальнай свабоды, у пачатку 1990-х гадоў, беларусы добраахвотна адмовіліся ад ядзернай зброі. Пры гэтым падпісанты Будапэшцкага мэмарандуму (1994) дэкляравалі гарантыі сувэрэнітэту Беларусі».
«У гэтай сытуацыі Рада БНР заклікае дзяржавы – падпісанты Будапэшцкага мэмарандуму, а таксама суседзяў Беларусі ініцыяваць разгляд на сэсіі Генэральнай асамблеі ААН пытаньня расейскай вайсковай акупацыі ў змове з узурпатарам улады Лукашэнкам. Беларусь як найхутчэй павінна быць вызваленая ад панаваньня двух дыктатараў, альянс якіх стварае рэальную пагрозу народам Усходняй Эўропы», — гаворыцца ў заяве Рады Беларускай Народнай Рэспублікі.
- 5 сьнежня 1994 году быў падпісаны дакумэнт аб гарантыях бясьпекі ў сувязі з далучэньнем Украіны да Дамовы аб нераспаўсюджаньні ядзернай зброі, які атрымаў назву «Будапэшцкі мэмарандум».
- Паводле яго, ЗША, Вялікая Брытанія і Расея абавязваліся паважаць незалежнасьць, сувэрэнітэт і існыя межы Ўкраіны, устрымлівацца ад пагрозаў або прымяненьня сілы і эканамічнага ціску, дамагацца неадкладных дзеяньняў Рады Бясьпекі ААН з мэтай аказаньня дапамогі Ўкраіне, калі яна стане ахвярай акту агрэсіі ці аб’ектам пагрозы агрэсіі з ужываньнем ядзернай зброі.
- Такія ж абавязаньні распаўсюджваюцца на Беларусь і Казахстан.
.