Хроніка перасьледу 12 жніўня: 6 гадоў калёніі 21-гадоваму гарадзенцу; яшчэ 17 чалавек прызналі палітвязьнямі

Затрымалі маці сьпявачкі Рыты Дакоты

Інфармацыя пра затрыманьне зьявілася ў адным з праўладных тэлеграм-каналаў. Жанчыну нібыта абвінавачваецца ва ўдзеле ў пратэставых акцыях і ёй пагражае крымінальная справа.

Рыта Дакота — расейска-беларуская сьпявачка. У 2020 годзе падтрымала пратэсты і выпусьціла песьню «Уходи», якую адрасавала Аляксандру Лукашэнку.

За заклікі да супраціву і гвалту гарадзенца асудзілі на 6 гадоў калёніі ўзмоцненага рэжыму

Суд Ленінскага раёна Горадні вынес прысуд 21-гадоваму Аляксею Багдзею. Яго прызналі вінаватым у арганізацыі масавых беспарадкаў, якія суправаджаліся гвалтам над асобай, пагромамі, падпаламі, зьнішчэньнем маёмасьці або ўзброеным супрацівам прадстаўнікам улады (арт. 293 КК) і прысудзілі 6 гадоў калёніі ўзмоцненага рэжыму. Справу разглядаў судзьдзя Максім Галубовіч, паведамляе «Вясна».

Суд быў на пачатку ліпеня, але праваабаронцам стала вядома пра яго толькі цяпер. Апэляцыйную скаргу на прысуд разгледзелі 4 жніўня, прысуд пакінулі бязь зьменаў.

З матэрыялаў абвінавачаньня вядома, што Аляксей у жніўні 2020 году ў тэлеграм-канале «Гродно для жизни» зьмяшчаў паведамленьні з заклікамі да гвалтоўных дзеяньняў, пісаў пра выраб кактэйляў Молатава, заклікаў да зрынаньня дзейнай улады, ужываньня гвалту, блякаваньня праездаў, супраціву прадстаўнікам улады.

Лінгвістычная экспэртыза прыйшла да высновы, што ў паведамленьнях ёсьць «выказваньні пабуджальнага характару, якія заклікаюць да гвалтоўных дзеяньняў і дзеяньняў, накіраваных на прычыненьне шкоды адной групай асобаў у дачыненьні да другой».

Падчас суду Багдзей віну прызнаў цалкам, але даваць паказаньні адмовіўся.

14 чэрвеня КДБ унёс Аляксея Багдзея ў сьпіс асобаў, датычных да тэрарыстычнай дзейнасьці.

У Гомлі асудзілі дэпартаванага з Расеі жыхара Жлобіна Віталя Гузава

Гомельскі абласны суд завяршыў разгляд крымінальнай справы жыхара Жлобіна Віталя Гузава, які абвінавачваўся ў распальваньні расавай, нацыянальнай, рэлігійнай альбо іншай сацыяльнай варожасьці або варажнечы (ч.1 арт 130) і абразе Лукашэнкі (ч.1 арт. 368).

Судовае пасяджэньне праходзіла ў закрытым рэжыме, таму падрабязнасьцяў справы няма. Судзьдзя — Мікалай Доля. Па выніках разгляду справы Гузаву прысудзілі 2 гады 6 месяцаў калёніі агкльнага рэжыму, паведамляе«Вясна».

Вядома, што Віталю 36 год. У лютым 2021 году сілавікі пасьля рашэньня аб дэпартацыі вывезьлі яго з Расеі ў Беларусь, паколькі абвінавачаны знаходзіўся ў вышуку. Адразу пасьля дэпартацыі сувязь зь ім прапала.

Працягваюцца затрыманьні родных «каліноўцаў»

Праўладныя тэлеграм-каналы паведамляюць пра затрыманьне жыхара Бабруйска Сяргея Франчука. На «пакаяльным відэа» ён «прызнаецца» ва ўдзеле ў акцыях пратэсту пасьля выбараў, а таксама ў тым, што пісаў нэгатыўныя камэнтары пра супрацоўнікаў міліцыі. Папярэдне, Франчуку прызначылі 15 дзён арышту за «непадпарадкаваньне», паведамляе«Вясна».

На відэа ён кажа, што зьяўляецца стрыечным братам намесьніка камандзіра ў Палку Каліноўскага Вадзіма Кабанчука. Ёсьць інфармацыя, што падчас затрыманьня Сяргея моцна зьбілі – на «пакаяльным відэа» ён стаіць з залепленым ілбом.

Раней паведамлялася, што былі затрыманыя родныя загінулага байца Палка імя Кастуся Каліноўскага Васіля Парфянкова.

Праваабаронцы прызналі палітвязьнямі яшчэ 17 чалавек

12 жніўня беларускія праваабаронцы прызналі палітычнымі зьняволенымі яшчэ 17 чалавек, пазбаўленых волі за абразу Лукашэнкі, прадстаўнікоў улады (супрацоўнікаў міліцыі), судзьдзяў і зьнявагу дзяржавы і дзяржаўных сымбаляў:

1. Васіль Чых, асуджаны па арт. 369-1 КК «Дыскрэдытацыя Рэспублікі Беларусь» на 1,5 года папраўчай калёніі агульнага рэжыму;
2. Натальля Леановіч, асуджаная па ч. 1 арт. 368 КК за абразу А. Лукашэнкі на 2 гады калёніі;
3. Віктар Хлябец, асуджаны па арт. 369 КК за абразу прадстаўніка ўлады на 1 год і 6 месяцаў калёніі;
4. Юры Голік, асуджаны па ч. 2 арт. 367 КК за паклеп на А. Лукашэнку на 2 гады калёніі;
5. Уладзіслаў Плюшчоў, асуджаны па арт. 188 і 369 КК за паклёп і абразу прадстаўніка ўлады на 2 гады калёніі;
6. Валеры Кліменчанка, асуджаны па ч. 1 арт. 130 КК за распальваньне сацыяльнай варожасьці ў «справе Зельцара» на 2 гады калёніі;
7. Іван Янчанка, асуджаны па ч. 1 арт. 130 КК за распальваньне сацыяльнай варожасьці па «справе Зельцара» на 2 гады калёніі;
8. Натальля Таран, асуджаная па ч. 1 арт. 368, ч. 2 арт. 367 і арт. 369 за абразу, паклёп у дачыненьні да А. Лукашэнкі і абразу прадстаўніка ўлады на 3 гады і 6 месяцаў калёніі;
9. Віктар Несьцераў, асуджаны па арт. 369 КК за абразу прадстаўніка ўлады на 1,5 года абмежаваньня волі з накіраваньнем у папраўчую ўстанову адкрытага тыпу;
10. Валеры Елісееў, асуджаны па арт. 369 КК за абразу прадстаўніка ўлады на 1,5 года абмежаваньня волі з накіраваньнем у папраўчую ўстанову адкрытага тыпу;
11. Віталь Прадыбайлаў, асуджаны па арт. 369 КК за абразу прадстаўніка ўлады на 1,5 года абмежаваньня волі з накіраваньнем у папраўчую ўстанову адкрытага тыпу;
12. Кірыл Давідзюк, узяты пад варту па арт. 370 за зьнявагу дзяржаўных сымбаляў;
13. Сяргей Кірэенка, узяты пад варту па арт. 130 ч. 1, 369 КК у «справе Зельцара»;
14. Дзьмітры Рыбак, узяты пад варту па арт. 368, 369 КК за абразу А. Лукашэнкі і прадстаўніка ўлады;
15. Алег Чычыкайла, узяты пад варту па арт. 368 КК за абразу А. Лукашэнкі;
16. Віталь Янчанка, узяты пад варту за збор і перадачу тэлеграм-каналу інфармацыі аб недахопах у працы сацыяльных аб’ектаў, а таксама фота і відэа перамяшчэньня вайсковай тэхнікі ў Гомельскай вобласьці, якую перадаваў «экстрэмісцкім» каналам;
17. Андрэй Славашэвіч, узяты пад варту па арт. 370 КК за зламанае дрэўка дзяржаўнага сьцяга.

Па стане на 12 жніўня беларускія праваабаронцы прызналі палітычнамі зьняволенымі ўжо 1276 чалавек.

Краязнаўцу і журналіста Ігара Хмару затрымалі за размову на беларускай мове на вуліцы

Пра гэта стала вядома ад чалавека, які знаходзіўся з Ігарам на Акрэсьціна, паведамляе «Вясна». Праваабаронцы адзначаюць, што гэта не адзінкавы выпадак — акрамя Ігара, на Акрэсьціна таксама былі людзі, якіх затрымлівалі за размовы па-беларуску на вуліцы.

Ігар Хмара быў затрыманы ўвечары 2 жніўня пасьля экскурсіі па Менску.

На 2 мужчын завялі крымінальную справу за блякаваньне дарог у 2020 годзе — доказамі сталі «сторыс» у Instagram

Праўладныя тэлеграм-каналы паведамляюць пра тое, што Дзяржынскі раённы СК завёў крымінальную справу паводле арт. 342 КК РБ у адносінах да 34-гадовага Ігара Пастухова і 32-гадовага Юрыя Джэнжэры. Іх абвінавачваюць у тым, што ў 2020-ым годзе яны перакрывалі рух транспарту ў Фаніпалі — а менавіта, шлі па дарозе падчас акцыі пратэсту.

Мяркуючы па відэа, якое апублікавалі сілавікі, доказамі «блякаваньня дарог» сталі «сторыс» аднаго з затрыманых у Instagram — на іх людзі ідуць па дарозе. Яны былі ў архіве профіля і знайшлі іх супрацоўнікі, хутчэй за ўсё, пасьля «вывучэньня» тэлефона мужчыны, піша «Вясна».

Затрымалі дырэктара друкарні, які ў 2020 годзе вырабляў і прадаваў «пратэстную сымболіку»

Сілавікі затрымалі індывідуальнага прадпрымальніка, дырэктара друкарні Marlene, які, паводле сілавікоў, у 2020 годзе вырабляў і прадаваў «пратэстную сымболіку». Відэа з затрыманым зьявілася ў блізкім да сілавікоў тэлеграм-канале, заўважыла «Медиазона».

Як сьцьвярджаюць сілавікі, дырэктару друкарні прызначылі «вялікі штраф», а рэшткі прадукцыі канфіскавалі, цяпер вырашаецца пытаньне аб завядзеньні крымінальнай справы.

Гэта ўжо ня першае затрыманьне ўладальніка друкарні, якая прадавала розную прадукцыю зь беларускім арнамэнтам, гербам «Пагоня» і бел-чырвона-белай сымболікай. У канцы ліпеня затрымалі ўладальніцу барысаўскага салёну фотадруку; у студзені 2022 году дырэктара прыватнай друкарні Арцёма Федасенку асудзілі да 4 гадоў калёніі па абвінавачаньні ў вырабе і распаўсюджваньні «пратэстных улётак, стыкераў, газэт», а таксама ва ўдзеле ў пратэставых маршах у жніўні-верасьні 2020 году.

Затрыманьні ў Баранавічах і Бараўлянах

За ўдзел у пасьлявыбарчых пратэстах затрымалі жыхара Бараўлянаў Дзьмітрыя Латушкіна. Праўладныя тэлеграм-каналы паведамляюць, што 33-гадовы супрацоўнік «Мінгаз» нібыта прымаў удзел у акцыях пратэсту ў 2020 годзе і перакрываў рух транспарту — за гэта і быў затрыманы супрацоўнікамі міліцыі, піша «Вясна».

Таксама праўладныя тэлеграм-каналы паведамляюць пра затрыманьне жыхара Баранавічаў, 45-гадовага Андрэя Гіля. Паводле іх, мужчыне прысудзілі 15 дзён адміністрацыйнага арышту паводле арт. 19.11 КаАП («Распаўсюд экстрэмісцкіх матэрыялаў»), а таксама завялі супраць яго крымінальную справу паводле арт. 369 («Абраза прадстаўніка ўлады») за абразу міліцыянта.