Міністар замежных спраў Украіны Дзьмітры Кулеба паабяцаў адрэагаваць на заяву Аляксандра Лукашэнкі, які даў згоду пусьціць у Менск сьледчых з самаабвешчанай ЛНР, каб тыя дапыталі беларускага блогера Рамана Пратасевіча. Што зьвязвае эканоміку Беларусі і Ўкраіны?
Экспарт
Адзін з асноўных пакупнікоў беларускіх нафтапрадуктаў
Па статыстыцы экспарту за студзень-сакавік гэтага году, Украіна на другім месцы па набыцьці беларускіх нафтапрадуктаў. Іх прадалі ва Ўкраіну на 413 мільёнаў даляраў. Больш толькі ў Нідэрлянды — на 431 мільён даляраў, вынікае з дадзеных Белстату.
За 2020 год ва Ўкраіну прадалі нафтапрадуктаў на 1,2 мільярда даляраў. Гэта больш, чым у іншыя краіны.
ГЛЯДЗІЦЕ ТАКСАМА: Ва Ўкраіне раскрылі маштабную схему кантрабанды нафтапрадуктаў зь Беларусі і Расеі
Адзін з асноўных пакупнікоў беларускіх азотных угнаеньняў
Украіна, па выніках мінулага году, — адзін з асноўных пакупнікоў беларускіх азотных угнаеньняў. Гэтага тавару ва Ўкраіну летась прадалі на 43 мільёны даляраў. Больш толькі ў Францыю — на 50 мільёнаў даляраў.
Сёлета са студзеня па сакавік Украіна набыла азотных угнаеньняў зь Беларусі на 14,5 мільёна даляраў. І гэта рэкорд за гэты час сярод усіх іншых краін.
ГЛЯДЗІЦЕ ТАКСАМА: Украіна мае абмежаваць пастаўкі беларускіх угнаеньняў. Раней ад гэтага адмовіліся пад ціскам аграрыяў
Другі буйны пакупнік беларускіх трактароў
Сёлета са студзеня па сакавік Беларусь прадала ва Ўкраіну трактароў і седлавых цягачоў на 29 мільёнаў даляраў. Больш толькі ў Расею — на 85 мільёнаў.
За мінулы год Беларусь прадала ва Ўкраіну трактароў на 62 мільёны даляраў, ізноў жа больш — толькі ў Расею.
ГЛЯДЗІЦЕ ТАКСАМА: 227 камбайнаў, 39 664 трактары. Хто і пачым набывае «гонар беларускай прамысловасьці»
Чацьверты буйны пакупнік беларускіх грузавікоў
Са студзеня па сакавік Украіна набыла беларускіх грузавікоў на 57 мільёнаў даляраў, больш — толькі Расея, Індыя і Ўзбэкістан.
Імпарт
Другі пастаўшчык сланечнікавага алею
Летась Беларусь набыла ва Ўкраіне сланечнікавага алею на 15 мільёнаў даляраў. Украіна — другі буйны пастаўшчык гэтага прадукту ў Беларусь. На першым месцы — Расея: там закупілі сланечнікавага алею ў чатыры разы больш.
ГЛЯДЗІЦЕ ТАКСАМА: З Расеяй мінус 22%, з Украінай мінус 24%. У Беларусі зьніжаецца таваразварот з асноўнымі гандлёвымі партнэрамі
Асноўны пастаўшчык чыгуначных і трамвайных вагонаў
Летась Беларусь набыла ва Ўкраіне чыгуначных і трамвайных вагонаў на 61,5 мільёна даляраў. Украіна — асноўны пастаўшчык гэтай прадукцыі ў Беларусь.
Таксама Беларусь закупляе ва Ўкраіне:
- Лекі
- Плястмасавую тару
- Пракат са сталі
- Тару з паперы і кардону
- І шмат чаго іншага
У 2020 годзе таваразварот паміж Беларусьсю і Ўкраінай склаў 4,5 мільярда даляраў. Экспарт — 3,1 мільярда, імпарт — 1,4 мільярда.
ГЛЯДЗІЦЕ ТАКСАМА: Украіна ўвяла абмежаваньні на пастаўку грузавога і пасажырскага транспарту зь Беларусі ГЛЯДЗІЦЕ ТАКСАМА: Украіна абмежавала пастаўкі запалак зь Беларусі і Расеі, абвінаваціла іх у дэмпінгу ГЛЯДЗІЦЕ ТАКСАМА: Украіна ўводзіць забароннае мыта на імпарт цэмэнту з Расеі, Беларусі і Малдовы