У берасьцейскім Доме правасудзьдзя працягваецца суд над чацьвёртай групай абвінавачаных ва ўдзеле 13 верасьня ў карагодзе на скрыжаваньні бульвару Касманаўтаў і праспэкту Машэрава.
Усяго на падсуднай лаве 12 чалавек. Справу разглядае судзьдзя Сяргей Маручак.
28 траўня ў судзе Берасьцейскага раёну дзяржаўныя абвінаваўцы Аляксей Ярошык і Аляксандар Плышэўскі папрасілі судзьдзю прызнаць іх вінаватымі па ч.1 ст.342 Крымінальнага кодэксу і прызначыць пакараньне для:
- Яўгена Сіняка — 2 гады «хіміі»,
- і ягонага сына, 19-гадовага палітвязьня Арсена Сіняка — 2 гады «хіміі» (ён з 9 лютага знаходзіцца ў берасьцейскім СІЗА № 7 ),
- паэта-пчаляра Мікалая Папекі — 2 гады «хіміі»,
- Андрэя Ляшко — 1 год 6 месяцаў «хіміі»,
- яго цяжарнай жонкі, маці дваіх дзяцей Паліны Ляшко — 1 год 6 месяцаў «хатняй хіміі»,
- Рамана Яхіна — 2 гады «хатняй хіміі» (палітзьняволены, знаходзяцца ў берасьцейскім СІЗА № 7 з 9 лютага 2021),
- Вольгі Глушэнь — 1 год 6 месяцаў «хатняй хіміі» (палітзьняволеная, знаходзяцца ў берасьцейскім СІЗА № 7),
- Марыны Дарашук — 1 год 6 месяцаў «хатняй хіміі»,
- Рамана Дземідовіча — 1 год 6 месяцаў «хатняй хіміі»,
- Вікторыі Каральчук — 1 год 6 месяцаў «хатняй хіміі»,
- Алесі Крамчанінай — 1 год 6 месяцаў «хатняй хіміі»,
- Сьвятланы Марчук — 1 год 6 месяцаў «хатняй хіміі».
Усіх іх абвінавачваюць паводле ч. 1 артыкулу 342 Крымінальнага кодэксу («Падрыхтоўка да парушэньня грамадзкага парадку»). Санкцыя ў гэтым выпадку прадугледжвае штраф, або арышт, ці абмежаваньне або пазбаўленьне волі на тэрмін да трох гадоў. Ніхто з 12 фігурантаў да гэтага моманту ня меў судзімасьці.
ГЛЯДЗІЦЕ ТАКСАМА: «Такія працэсы трэба праводзіць на стадыёне». У Берасьцi cудзяць яшчэ 12 фігурантаў «карагоднай справы»Азнаёміцца са справай на беларускай мове нельга
Адзін зь фігурантаў справы, пружанскі паэт і пчаляр Мікола Папека (сябра Беларускага ПЭН-цэнтру, Саюзу беларускіх пісьменьнікаў), доўга змагаўся (у тым ліку на судовых паседжаньнях) за магчымасьць азнаёміцца з матэрыяламі справы па-беларуску. Аднак атрымаў ад судзьдзі Маручанка пісьмовы адказ, у якім той зазначыў, што «падстаў для азнаямленьня з матэрыяламі справы на беларускай мове няма».
«На жаль, я зразумеў, што ў гэтых структурах юстыцыі зьневажаюць і дыскрэдытуюць беларускую мову. Больш за тое, людзям, якія размаўляюць па-беларуску, больш і „дастаецца“: іх б’юць, пазначаюць колерам», — сказаў Мікола Папека ў размове са Свабодай перад пачаткам першага судовага паседжаньня.
Раней паэт дамогся, каб на допыце ён мог размаўляць на роднай мове. Тады яго дапытвалі празь перакладчыка.
У чым абвінавачваюць падсудных?
Згодна з вэрсіяй абвінавачаньня, падсудныя ў групе зь іншымі асобамі наўмысна ўзялі актыўны ўдзел у групавых дзеяньнях, якія груба парушаюць грамадзкі парадак. Іх дзеяньні нібыта былі спалучаныя зь непадпарадкаваньнем законным патрабаваньням прадстаўнікоў улады, пацягнулі за сабой парушэньне працы транспарту, арганізацый і прадпрыемстваў. У прыватнасьці, з прычыны прастою тралейбуснаму парку была нанесеная шкода 619 рублёў 55 капеек, аўтобуснаму — 40 рублёў 37 капеек, на некалькі гадзін зачыніліся гандлёвыя павільёны і рэстаран хуткага харчаваньня. Пацярпелым бокам у справе выступаюць тралейбусны і аўтобусны паркі.
ГЛЯДЗІЦЕ ТАКСАМА: У Берасьці судзяць 13 новых фігурантаў «карагоднай справы»У Берасьці ў «справе карагода» раней адбыліся ўжо 3 суды. Суды над чацьвёртай (12 асобаў) і пятай групай (13 асобаў) яшчэ працягваюцца. Агулам асудзілі 34 фігуранты, траіх зь іх адправілі ў калёнію.
Справа карагодаў — адна з самых масавых палітычных справаў у Беларусі. Колькасьць абвінавачаных у ёй на гэты момант складае больш за 70 чалавек. Аднак сілавікі да сёньня працягваюць шукаць удзельнікаў тых падзеяў.
ГЛЯДЗІЦЕ ТАКСАМА: Ад 3 гадоў выхаваўчай калёніі і да 5 гадоў у турме. У Берасьці вынесьлі прысуд 13 фігурантам «справы аб пагромах» 10 жніўня