Супрацоўніца Крычаўскага райвыканкаму Марына Максімава вінаваціць незалежную газэту «Вольны горад» у зьнявазе гонару, годнасьці і дзелавой рэпутацыі. Праз суд яна зьбіраецца спагнаць дзесяць мільёнаў рублёў кампэнсацыі маральнай шкоды. Крычаўскі раённы суд прызначыў разгляд скаргі Максімавай на 22 кастрычніка.
Як вынікае з пазову, Марыну Максімаву зьняважыла выказваньне ў публікацыі «Не в своём кресле», якая зьявілася на сайце выданьня. Яно тычылася выканьня чыноўніцай службовых абавязкаў. «Фактычна мяне назвалі жывёлай, якая села ў крэсла кіраўніка», — кажа пра абразу пазоўніца ў скарзе.
«Паколькі да артыкула дададзена мая фатаграфія, а большая частка жыхароў Крычава карыстаецца інтэрнэтам, я часта ў крамах і грамадзкім транспарце чую за сваёй сьпінаю абгаворы і ўсьмешкі», — адзначае ў пазове Максімава.
Як вынікае з пазову, зьняважлівая публікацыя давяла Марыну Максімаву да таго, што яна ня можа сканцэнтравацца на сваёй працы, пагоршылася яе самаадчуваньне і псыхалягічны стан.
«Мне нанесена маральная шкода, якая выразілася ў зьнявазе, сораме, немагчымасьці працягваць актыўную грамадзкую дзейнасьць, а таксама я апынулася ў стане стрэсу, празь які ў мяне зьявіліся праблемы са здароўем», — даводзіць у скарзе ў суд Марына Максімава.
Паводле рэдактара газэты «Вольны горад» Сяргея Няроўнага, у публікацыі «Не в своём кресле» аўтар крытыкуе мясцовую ўладу і раённую газэту за адсутнасьць інфармаваньня пра выпадак, калі напярэдадні сёлетняга навучальнага году абвалілася частка будынку гімназіі.
«Жыхары Крычава, — даводзіць журналіст, — чакаюць, што скажа ўлада пра здарэньне, але яна маўчыць».
Сяргей Няроўны
«Аўтар у публікацыі падае законы, якія гарантуюць грамадзянам права на атрыманьне інфармацыі. Ён пачаў дасьледаваць, хто мусіць адказаць за такое маўчаньне, і палічыў, што гэта ідэалягічны аддзел і яго кіраўніца Марына Максімава. Аўтар дазволіў сабе такі журналісцкі мэтафарычны прыём, каб давесьці, што ідэалягічны аддзел з сваёй начальніцай працуе непрафэсійна. Наагул, сытуацыя з замоўчваньнем мясцовых праблемаў у гаспадарцы і сацыяльнай сфэры характэрная для Крычава», — заяўляе Сяргей Няроўны.
Сяргей Няроўны лічыць, што пазоў у суд на «Вольны горад» мае тыя ж карані, што і перасьлед журналістаў-фрылансэраў. «Напярэдадні прэзыдэнцкіх выбараў, — кажа ён, — улады імкнуцца прыціснуць незалежных журналістаў, каб тыя менш крытыкавалі, а больш хадзілі па судах».
«Вольны горад» рыхтуецца да суду, заяўляе рэдактар газэты.