У Міністэрстве замежных спраў адбылася літаратурная імпрэза «Ў дыялёгу культур». Яна была арганізаваная міністэрствам і літаратурным музэем Янкі Купалы і прымеркаваная да Міжнароднага дня роднай мовы.
Адкрываючы вечарыну, міністар Уладзімер Макей сказаў:
«Мова, культура, традыцыі, нацыянальныя каштоўнасьці — гэта падмурак, безь якога немагчымае існаваньне ні народу, ні краіны. Гэта скарб, якім мы павінны ганарыцца. Сёньня сам час патрабуе ад нас ня толькі зьвярнуцца да нашых вытокаў, але і паглыбляць знаёмства з традыцыямі, разьвіваць пачуцьцё грамадзянскасьці і любоў да радзімы».
На завяршэньне прамовы Ўладзімер Макей прачытаў «Санэт» Янкі Купалы.
відэа: БелаПАН
З нагоды 100-гадовага юбілею шлюбу Янкі Купалы і Ўладзіславы Станкевіч кіраўнікі і прадстаўнікі амбасадаў розных краін сьвету чыталі вершы пра каханьне розных беларускіх паэтаў і па-беларуску.
На завяршэньне ўдзельнікі і госьці паглядзелі выставу, прысьвечаную творчасьці беларускіх літаратараў розных гадоў.
