Судзяць музыку Хаўкіна
Менск. У Ленінскім судзе судзяць музыку, былога скрыпача «Крамбамбулі» Аляксандра Хаўкіна. Яму выклікалі хуткую ў судзе і ўчора ў РУУС. Пратрымалі ўчора 5 гадзінаў на расьцяжцы, стала блага.
Гомель. На фрылансэра Кастуся Жукоўскага ў Цэнтральным РАУСе склалі 4 пратаколы паводле артыкулу 22.9 — незаконны выраб прадукцыі СМІ.
Штраф за хуліганства Паліне Панасюк-Шарэндзе
Берасьце. Штраф у памеры 15 базавых велічыняў — такі прысуд агучыў судзьдзя Маскоўскага суду Берасьця ў дачыненьні да актывісткі з гораду над Бугам Паліны Панасюк-Шарэнды. У суботу актывістку затрымалі і абвінавацілі ў хуліганстве. Да сёньняшняга дня жанчына знаходзілася ў ізалятары часовага ўтрыманьня. Нягледзячы на яе звароты і скаргі пра тое, што яна маці двух няпоўнагадовых дзяцей, яе не адпусьцілі дадому.
Падчас суду міліцыянты зь Берасьця Рудавец і Ганчароў сьведчылі, што дзяўчына нецэнзурна лаялася ў іх прысутнасьці. Пратакол аб парушэньні Паліне Шарэндзе так і ня выдалі. Дзяўчына мае намер абскарджваць прысуд.
Алесь Лагвінец перад судом абняў сына-немаўля
Палітыка Алеся Лагвінца, затрыманага і зьбітага 23 сакавіка, судзяць у менскім судзе Маскоўскага раёну. Паводле ягонага сына Антося, спачатку затрыманага разам з бацькам, нікога з сваякоў на суд не пусьцілі, але ён пасьпеў абняць родных перад заляй суду, у тым ліку маленькага малодшага сына.
Лагвінца спрабавалі судзіць за «дробнае хуліганства» ў дзень затрыманьня, 23 сакавіка. Але з суду яму выклікалі «хуткую дапамогу» і адвезьлі ў лякарню. Са слоў сына, у Алеся Лагвінца страсеньне, закрытая чэрапна-мазгавая траўма, пералом носа. У лякарні яго пільнавалі «людзі ў цывільным».
Менск. Ленінскі раённы суд. Мікіта Краснакуцкі з «Моладзі БНФ» пакараны на 10 сутак арышту.
Менск. Ленінскі раённы суд. Музыка Аляксандар Хаўкін распавёў, што яго моцна зьбівалі, у тым ліку пінкамі заганялі ў аўтазак. Ударылі па сківіцы гэтак, што два дні мог есьці толькі адным бокам. Яшчэ Хаўкін наракае, што не давалі пазваніць жонцы і сваякам.
Менск. Ленінскі раённы суд. Павал Белавус распавеў: «Учора зусім не кармілі, толькі сёньня раніцай далі кашу — сечку з разынкамі». Жартуе: «Ужо, відаць, накалупалі».
Суд над Паўлам Белавусам, гукавы-анлайн:
Апэратару «Белсату» Баразенку — 15 сутак
У Маскоўскім судзе Менску апэратара тэлеканалу «Белсат» Аляксандра Баразенку асудзілі за «дробнае хуліганства» на Дзень Волі на 15 сутак арышту — ён нібыта «крычаў і лаяўся, абураўся дэкрэтам №3 і не рэагаваў на папярэджаньні».
Баразенку судзіла судзьдзя Тацяна Мотыль, супраць яго сьведчылі амапаўцы Арцём Міхалевіч і Варывончык (імя назваў неразборліва). Баразенка просіць Міхалевіча назваць брыдкія словы, якія ён нібыта казаў. Міхалевіч адмовіўся, але пагадзіўся напісаць. Паказаньні на карысць Баразенкі давалі прадстаўнік «Белсату» Аляксей Мінчонак і журналістка Кацярына Андрэева.
«Белсат» вёў жывую трансьляцыю:
На Дзень Волі затрымлівалі і іншых журналістаў, якія супрацоўнічалі з Белсатам: Віктара Масаловіча і Андрэя Шобіна ў Менску, Ларысу Шчыракову ў Гомлі. Апошнюю выклікаюць у суд 28 сакавіка.
Менск. Ленінскі раённы суд. Аляксандру Хаўкіну судзьдзя А. Карнейчык дала штраф 25 базавых велічынь. Ён пасьля суду заявіў, што будзе абскарджваць пастанову суду.
Судзяць хворага на дыябэт
Гомель. У суд Цэнтральнага раёну прывезьлі Багуслава Гвозьдзева, Віктара Чумачэнку, а таксама 41-гадовага актывіста прафсаюзу РЭП Аляксандра Еўсейчука, які хварэе на цукровы дыябэт.
Еўсейчук паведаміў, што належнай мэдычнай дапамогі ў ізалятары не аказвалі. Узровень цукру ў крыві 13,8 м/м. Сказалі, калі будзе звыш 20, тады будуць ратаваць.
Вінярскаму — 8 сутак
Менск. Максіма Вінярскага пакаралі 8 суткамі арышту. Яго судзілі ў Партызанскім судзе. «Ўсяго толькі?» — зьдзівіўся Вінярскі. Пасьля прысуду ён сказаў судзьдзі Валчковай: «Усё роўна я лічу вас вінаватай у рэпрэсіях, калі-небудзь вы адкажаце за гэта».
Міліцыянты пагражалі «згнаіць у турме» пэнсіянэра, якога ня могуць асудзіць, бо ён не называе прозьвішча
Спадара Валера затрымалі на акцыі 25 сакавіка, але праз адсутнасьць прозьвішча і дакумэнтаў ня могуць распачаць над ім суд. Мужчыну каля 60 год, у яго могуць быць пашкоджаныя рэбры.
Полацак. Прайшлі суды ў Полацку. Праваабаронцу Юрыя Бельскага прызналі вінаватым у хуліганстве — нібыта ён лаяўся матам раніцай 25 сакавіка, калі яго выклікалі на гутарку ў Сьледчы камітэт.
Затрыманаму пасьля ператрусу на полацкім офісе Свабоднага прафсаюзу Беларускага прафсаюзнаму актывісту Віктару Стукаву прысуджаны штраф памерам 20 базавых велічынь. Таксама за хуліганства: нібыта лаяўся матам падчас ператрусу.
Актывіст БХД Дзяніс Садоўскі аштрафаваны судом Цэнтральнага раёну на 80 базавых велічынь (1840 рублёў ці 978 даляраў).
Прысуды ў Віцебску
Віцебск. Журналіст Арцём Сізінцаў з Воршы — 10 сутак за ўдзел у несанкцыянаванай акцыі.
Праваабаронца Леанід Сьвецік за акцыі 25-га і 26-га — 15 сутак.
Суд над журналістам Канстанцінам Мардзьвінцавым судзьдзя Іна Грабоўская праводзіць у закрытым рэжыме — у сваім кабінэце. За дзьвярыма каля 10 чалавек, у кабінэце — 2, чатыры крэслы вольныя. Перайсьці ў вялікую залю судзьдзя адмовілася.
***
Віцебскі праваабаронца Павал Левінаў мінулай ноччу быў пераведзены з ізалятару часовага ўтрыманьня ў шпіталь У яго падвышаны ціск. Пасьля затрыманьня 26 сакавіка яму стала кепска, у Кастрычніцкі РАУС выклікалі хуткую дапамогу, але шпіталізаваць Левінава мэдыкі адмовіліся. Пасьля адпраўкі ў ІЧУ яму стала горш. Праваабаронцу ўсе-такі паклалі ў шпіталь.
Аднавіўся працэс над Паўлам Белавусам. Пасьля паказаньняў сьведак-журналістаў сьведка-міліцыянт Яфанаў, які раней казаў, што затрымліваў Белавуса, цяпер прызнаў, што не затрымліваў сам, а толькі перадаў калегам, каб затрымалі. Сказаў, што забыўся пра гэта і таму адразу не сказаў. Зьмяніў паказаньні і другі сьведка-міліцыянт. «Так, не затрымліваў, перадаў па рацыі. Але Белавус мацюгаўся».
Павал папрасіў судзьдзю, каб той прымусіў сьведак назваць матныя словы, якімі нібыта лаяўся. Але судзьдзя адмовіў: «Не дазволю, каб у маім судзе мацюкаліся». Тады Павал папрасіў, каб яны напісалі гэтыя словы на паперы, але суд і ў гэтым адмовіў.
Сьведка Сяргей Мірончык, намесьнік камандзіра атраду міліцыі спэцпрызначэньня, сказаў, што Белавус каля ўнівэрсаму «Цэнтральны» зрабіў правапарушэньне і ён яго затрымаў. На пытаньне судзьдзі, чаму ў справе няма ягоных тлумачэньняў, сказаў, што кіраваў падразьдзяленьнем. Прызнаў, што ў момант затрыманьня Белавус ня лаяўся. Сьведкі-міліцыянты блытаюцца ў паказаньнях.
Бабруйск. Затрыманага ўчора Аляксея Даніленку судзілі за ўдзел у мітынгу 12 сакавіка на падставе знойдзенага ў тэлефоне фатаздымку. Прысудзілі штраф 100 рублёў. Суд абдыўся не ў ізалятары, як меркавалася раней, а ў гарадзкім судзе.
Аляксандра Яўсейчука з Гомеля пакаралі двума суткамі арышту, якія ён ужо адседзеў. Цяпер яму выклікалі хуткую, у яго цукровы дыябэт. Судзьдзя Сяргей Кармановіч.
Суд Чыгуначнага раёну Гомеля пакараў Ксеню Кавалёву штрафам у 10 базавых (230 рублёў). Да суду яна правяла двое сутак у ізалятары.
Бабруйск. Затрыманага 24 сакавіка Ўладзімера Лазарава судзілі за ўдзел у мітынгу 12 сакавіка — штраф 5 базавых (100 р).