Бібліятэкі, парталы
Беларуская палічка. Заснаваная ў 1996 годзе электронная бібліятэка мае вялікі збор дзіцячай літаратуры — і беларускай, і перакладзенай на беларускую, у тым ліку клясыкаў і сучасных аўтараў — Шарля Пэро, братоў Грым, Ганса Крыстыяна Андэрсэна, Джаўэн Роўлінґ і г.д.
Беларуская інтэрнэт-бібліятэка Kamunikat. Працуе з 2000 году. У разьдзеле „Дзіцячая літаратура“ і друкаваныя выданьні (як „Віня-Пых“ А. Мілна), і аўдыёкнігі. Сабраныя эміграцыйныя дзіцячыя выданьні, а таксама падручнікі беларускае мовы і літаратуры для беларускіх школьнікаў Падляшша.
Настаўнік.info — партал з матэрыяламі для настаўнікаў і школьнікаў, працуе ад 2005 году. У рубрыках „Для школьных сьвятаў“, „Дашкольнаму пэдагогу“ і іншых песьні, у тым ліку мінусоўкі, калыханкі, аўдыёказкі, мультфільмы, дыяфільмы. Ёсьць два мультымэдыйныя дыскі „Гадуем беларусаў“ — адзін для дашкольнікаў і малодшых школьнікаў, другі для дзяцей сярэдняга школьнага ўзросту, ёсьць „Чытанка для дзіцячага садка“ і шмат што яшчэ.
Жанравыя рэсурсы
Бэйбус — ютуб-канал для маленькіх гарэзаў і дарослых жэўжыкаў (папулярнае слова!). Мае плэйлісты: Казкі з Маляванычам, Асьцярожна, дзеці (відэавэрсія часопіса), Вясёлы садок, Пра сланоў і барсучкоў для дзяўчат і хлапчукоў — мультвершы Андрэя Скурко, прысланыя з-за кратаў, і іншае.
Гаварун — мульфільмы па-беларуску: перакладныя фільмы і сэрыялы, арыгінальныя беларускія анімацыі, навучальныя стужкі.
Краіна казак — казкі для дзяцей ды іхных бацькоў у фарматах кніг, мульфільмаў, дыяфільмаў. Аўдыёказкі чытаюць іх аўтары (Сяржук Вітушка, Алена Масла і іншыя), народныя казкі — у выкананьні Віктара Манаева.
Жэўжык — клюб для кемлівых дзяцей. Выпускае аднайменны альманах (тэматычныя выпускі), вядзе онлайн-заняткі, анансуе заданьні ў форме забаўлянак. Суполка ў фэйсбуку і сайт.
Дзіцячыя песьні — народныя і аўтарскія — у апрацаваньні і выкананьні Тацяны Грыневіч-Матафонавай на сьвяты і на штодзень (ёсьць і мінусоўкі) на яе ютуб-канале.
