Працягваем агляд рэсурсаў сеціва, прысьвечаных вывучэньню і практычнаму выкарыстаньню беларускае мовы. Як высьветліць, ці няма ў тэксьце правапісных памылак?
Правапіс (спэлчэкеры)
- Сэрвіс „Добрапіс“ ад мовазнаўцы Зьмітра Саўкі і тэлеканалу „Белсат“ дазваляе правяраць напісанае двума правапісамі — і клясычным (тарашкевіцай), і афіцыйна прынятым у Рэспубліцы Беларусі (наркамаўкай). Слова беларушчына сэрвіс ня лічыць памылкай — гэта тэст на слоўнікавы запас такіх праграмаў :-)
- Сэрвіс „Праверка правапісу“ на ўнівэрсальным моўным рэсурсе „Беларускі N-корпус“. Сэрвіс правярае толькі напісанае афіцыйным правапісам. Ён жа ўбудаваны ў некамэрцыйны офісны пакет LibreOffice (вэрсія 7.1.6 і наступныя).
- У праграме LanguageTool, якая працуе ў Chrome, Firefox, Safari, Edge, Opera, Thunderbird, можна выбраць праверку правапісу беларускае мовы, але таксама толькі афіцыйнага (і з абмежаваным слоўнікам).
- Аналягічна працуюць „Пакет праверкі беларускай арфаграфіі“ для Windows і Microsoft Office і Belarusian Spellcheck Dictionary для Firefox.
Рарытэт
Першым унівэрсальным (разьлічаным і на клясычны, і на афіцыйны правапісы) электронным карэктарам была праграма „Літара“ Фёдара Піскунова. Праграма дазваляе і канвэртаваць тэксты з аднаго правапісу ў другі. Працуе з MS Word (Microsoft Office 2000) у АС Windows NT, ME, 2000, XP, вэрсія LitaraN02 — з MS Word 2007. Да яе аўтар дадаў граматычную аплікацыю „Парадыгма“.
Дыстрыбуцыйны пакет быў на цяпер закрытым уладамі рэсурсе, выходзіў і на дысках. Некаторыя захоўваюць стары Word адмыслова, каб працаваць зь „Літарай“.
Агляд актуальных правапісных рэсурсаў тут.
Працяг будзе.
