Актывісткі руху «Маці 328», якія дамагаюцца лібэралізацыі антынаркатычнага артыкулу 328 Крымінальнага кодэксу, а таксама перагляду спраў сваякоў і сустрэчы з Аляксандрам Лукашэнкам, галадаюць 11-ы дзень.
Што важна ведаць:
- 13 жанчын працягваюць галадоўку ў Каленкавічах і Востраве. Іх стан здароўя пагаршаецца, частка зь іх, верагодна, спыніць галадоўку 7 траўня.
- Да галадоўкі абяцаюць далучыцца жанчыны з Горадні.
- Сустрэча галадоўніц з генпракурорам Беларусі, якая мусіла адбыцца 4 траўня, адкладзеная на няпэўны час.
- 2 траўня сем галадоўніц руху «Маці 328» з Каленкавічаў сустрэліся з прадстаўнікамі адміністрацыі Аляксандра Лукашэнкі. Пасьля сустрэчы «Маці 328» адмовіліся спыніць галадоўку.
- 27 красавіка актывісты руху «Маці 328» у Каленкавічах на Гомельшчыне і ў вёсцы Востраў на Меншчыне распачалі галадоўку. 3 траўня да іх далучылася жанчына ў Віцебску.
- Удзельнікі галадоўкі патрабуюць перагляду жорсткіх прысудаў, якія выносіліся ад 2013 году паводле 328 артыкула КК кодэксу (ад 5 да 25 гадоў пазбаўленьня волі), а таксама зьменаў у заканадаўства.
- У Палаце прадстаўнікоў абяцалі зьмякчыць пакараньні паводле «наркатычнага» артыкула 328.
«Больш ляжым, беражом сілы», — галадоўніцы ў Каленкавічах
У Каленкавічах працягваюць галадоўку шэсьць жанчын, якія дамагаюцца перагляду крымінальных спраў сваіх дзяцей і мужоў, асуджаных на вялікія тэрміны за спажываньне і распаўсюд наркатычных рэчываў паводле артыкулу 328.
«Самаадчуваньне нашае адпавядае тэрміну галадоўкі: трымаемся, — паведаміла Свабодзе Тацяна Канеўская. — Цяпер радзей выходзім на прагулкі, больш ляжым, беражом сілы. Кожны дзень да нас прыяжджае „хуткая“ — замяраюць ціск, робяць, каму патрэбна, аналіз узроўню цукру ў крыві».
Галадоўніцы маюць спадзеў, што ўжо сёньня атрымаюць абяцанае паведамленьне з адміністрацыі Лукашэнкі наконт даты перагляду антынаркатычнага заканадаўства ў Палаце прадстаўнікоў.
«Паведаміць пра дату разгляду зьменаў у заканадаўства нам абяцала падчас сустрэчы ў Адміністрацыі прэзыдэнта Натальля Качанава. Пачаўся новы працоўны тыдзень, таму й чакаем адказу ўжо сёньня», — дадае Канеўская.
Жанчыны рыхтуюць зварот у Вярхоўны суд з тым, каб ягоны пленум перагледзеў правапрымяняльную практыку ў судах пры вызначэньні пакараньня паводле крымінальнага артыкулу 328, калі справа ня тычыцца цяжкіх наркотыкаў і арганізацыі аптовага распаўсюду. Падобныя прапановы галадоўніцы маюць накіраваць і ў Генэральную пракуратуру.
Тацяна Канеўская паведаміла таксама, што лідэрка руху «Маці 328» Ларыса Жыгар пераяжджае з Пухавіцкага раёну ў Горадню, каб там падтрымаць жанчын, якія далучыліся да акцыі пратэсту.
На момант публікацыі сем жанчын галадаюць у Пухавіцкім раёне (да іх маюць прыехаць мэдыкі — пасьля агляду дзьве жанчыны, магчыма, будуць вымушаныя спыніць галадоўку), яшчэ шэсьць у Каленкавічах. Да галадоўкі абяцаюць далучыцца жанчыны з Горадні.
У Віцебску на чацьвёрты дзень мае спыніць галадоўку Натальля Шарыпа — яна аказалася адзінай у горадзе, хто адважыўся на такую акцыю пратэсту, але 7 траўня плянуе выхад у горад і наведваньне шэрагу ўстаноў (КДБ, аблвыканкам, да памочніка Лукашэнкі і ў тэлефонную кампанію МТС — яна мяркуе, ейны тэлефон незаконна праслухоўваюць).
2 траўня сем галадоўніц руху «Маці 328» з Каленкавічаў сустрэліся з прадстаўнікамі адміністрацыі Аляксандра Лукашэнкі. Пасьля сустрэчы «Маці 328» адмовіліся спыніць галадоўку. Сустрэча галадоўніц з генпракурорам Беларусі, якая мусіла адбыцца 4 траўня, адкладзеная на няпэўны час.
Чыста беларускі сюжэт, або Што стаіць за фэномэнам галадоўкі «Маці 328»
Асноўныя факты пра прымяненьне «наркатычнага» артыкулу 328 у Беларусі
