Сябру Абʼяднанай грамадзянскай партыі Ірыну Давідовіч апыталі ў пастарунку за распаўсюджваньне разам зь іншымі актывістамі інфармацыйных матэрыялаў у раённым цэнтры.
Ірына Давідовіч сказала, што сапраўды 28 траўня разам з аднапартыйцамі хадзіла на рынак і раздавала прадпрымальнікам інфармацыйныя матэрыялы.
— У матэрыялах была антыкарупцыйная плятформа АГП, а таксама парады для прадпрымальнікаў пра тое, як выжываць у складанай эканамічнай сытуацыі. На пытаньне міліцыянта — ці выкрыквалі нейкія лёзунгі і заклікі — адказала, што нічога не выкрыквалі. Ён так і запісаў, і на гэтым апытаньне скончылася.
Давідовіч сказала, што запатрабавала, каб ейнае апытаньне міліцыянт запоўніў па-беларуску:
«Яго гэта трохі засмуціла, але тым ня менш ён запісаў яго на беларускай мове».
