Чарнобыльскі шлях – 2013. Жывы рэпартаж

Вясна паведамляе выніковы сьпіс затрыманых 26 красавіка:

Экалагічныя актывісты Ірына Сухій, Васіль Сінюхін, Канстанцін Кірыленка, Вольга Канавалава ў 18.00 былі затрыманыя на кватэры старшыні “Экадом” Ірыны Сухій. У 21. 00 адпушчаныя з Першамайскага РУУС.

Назіральнік-праваабаронца Вячаслаў Дашкевіч у 19.40 быў затрыманы каля Савецкага РУУС.
Анархіст Ігар Трухановіч быў затрыманы каля дома па адрасе вул. Багдановіча, 78, яго моцна збілі, пасля на аўтамабілі Volkswagen (рэгістрацыйны нумар 94 30 ІК-7) даставілі ў Савецкі РУУС. Зараз чакае суда на Акрэсціна.

Журналістак "Нашай Нівы" Ірыну Арахоўскую і Аксану Рудовіч затрымалі падчас таго, як яны здымалі на відэа збіццё Ігара Трухановіча, таксама даставілі ў Савецкі РУУС, у 21. 30 яны былі вызваленыя.

Пасля заканчэння акцыі ў 21.30 былі затрыманыя актывісты "Еўрапейскай Беларусі"Аляксандр Тарнагурскі і Зміцер Чарняк. Чакаюць суда на Акрэсціна.

У 21.45 былі затрыманыя Алена Вітко (пазней вызвалена), Ян Мельнікаў(вызвалены позна ўвечары), Інна Казлоўская (непаўнагадовая, забралі бацькі) і дзяўчына Наста (прозвішча невядомае). Былі дастаўленыя ў Савецкі РУУС.

У 22.30 затрымалі журналістаў беларускага “Радыё Рацыя” Аляксандра Ярашэвіча і Генадзя Барбарыча. Былі дастаўленыя ў Савецкі РУУС. Зараз знаходзяцца ва ІЧУ на Акрэсціна
http://spring96.org/be/news/62907

Генадзя Барбарыча і Аляксандра Ярашэвіча павезьлі на Акрэсьціна. У панядзелак суд

Барыс Гарэцкі: Затрымалі сябраў БАЖ Генадзя Барбарыча і Аляксандра Ярашэвіча. Знаходзяцца ў Савецкім РУУС.

Выніковы фотарэпартаж
Глядзець фотастужкай вялікага памеру

Журналістак «Нашай нівы» адпусьцілі з пастарунку.

Берасьцейскія сацыял-дэмакраты распаўсюдзілі ў горадзе некалькі соцень тэматычных буклетаў і памятак пра тое, як берагчы здароўе пасьля аварыі на ЧАЭС

У Магілёве апазыцыя і ўлада паасобку адзначылі гадавіну Чарнобыльскай трагедыі на ўскрайках гораду.

Каля 30 чалавек прайшлі да Чарнобыльскай капліцы, усклалі кветкі, запалілі зьнічы, пасьля чаго разышліся.

Мікалай Уласевіч, каардынатар ініцыятывы «Астравецкая АЭС — гэта злачынства», быў затрыманы па дарозе на «Чарнобыльскі шлях» у Менск і правёў некалькі гадзін у міліцэйскім пастарунку ў Маладэчне. Зь ім гутарыў Аляксей Знаткевіч

Ігар Трухановіч у Савецкім РУУСе. Ірыну Сухій, Васіля Сінюхіна, Канстанціна Кірыленку, Вольгу Канавалаву адпусьцілі зь Першамайскага РУУСа.

Завяршаем відэатрансьляцыю

Журналісткі «Нашай нівы» знаходзяцца ў пастарунку Савецкага раёну.

Віталь Рымашэўскі абвяшчае пра завяршэньне мітынгу. Запрашае людзей прайсьці да Чарнобыльскай капліцы, каб ускласьці кветкі й запаліць сьвечкі. Гучыць «Жыве Беларусь!»

Выступае моладзевы актывіст Артур Фінкевіч. Кажа, што Беларусь зьяўляецца бязьядзернай краінай. «Мы павінны правесьці шырокую грамадзкую дыскусію — ці патрэбная нам станцыя». Апавядае пра будаўніцтва Пецярбурскай АЭС, дзе пару гадоў таму абрынуўся дах. А беларуская АЭС будуецца па такім самым праекце. «Мы патрабуем тэрмінова спыніць будаўніцтва астравецкай АЭС. Мы ня хочам новага Чарнобылю. Не— будаўніцтву АЭС».

Слова бярэ Генадзь Фядыніч, старшыня незалежнага прафсаюзу радыёэлектроннай прамысловасьці

Затрымалі журналістак «Нашай нівы» Аксану Рудовіч і Ірыну Арахоўскую.

Старшыня Партыі БНФ Аляксей Янукевіч зачытвае праект рэзалюцыі.