У апэратыўным камандаваньні Паветраных сіл Украіны паведамілі, што ў ноч на 30 верасьня Расея атакавала ўкраінскія гарады трыма ракетамі і 73 баявымі дронамі, адзін зь якіх паляцеў на тэрыторыю Беларусі.
«У выніку супрацьпаветранага бою зьбілі адну кіраваную авіяцыйную ракету Х-59/69 і 67 варожых ударных БПЛА тыпу Shahed у Кіеўскай, Чаркаскай, Віньніцкай, Кіраваградзкай, Жытомірскай, Палтаўскай, Чарнігаўскай, Сумскай, Харкаўскай, Днепрапятроўскай і Мікалаеўскай абласьцях. Адзін бесьпілётнік паляцеў у кірунку Беларусі, яшчэ тры лякацыйна згубіліся ў паўночных рэгіёнах Украіны ў выніку супрацьдзеяньня РЭБ (сродкамі радыёэлектроннай барацьбы)», — адзначаецца ў афіцыйным паведамленьні.
Як паведамілі ўлады ўкраінскіх абласьцей, у выніку расейскіх абстрэлаў загінулі чатыры асобы і яшчэ 21 чалавек паранены.
Расейская армія рэгулярна з розных відаў узбраеньня абстрэльвае ўкраінскія рэгіёны. Кіраўніцтва Расеі пераконвае, што не наносіць мэтанакіраваных удараў па цывільнай інфраструктуры і мірных жыхарах.
Украінская ўлады і міжнародныя арганізацыі кваліфікуюць гэтыя ўдары як ваенныя злачынствы Расеі і заяўляюць, што Расея мэтанакіравана зьнішчае аб’екты крытычнай інфраструктыры і мірных жыхароў.
У ноч на 26 верасьня, паводле зьвестак Telegram-каналу «Беларускі Гаюн», у Беларусь заляцела ня менш за 4 расейскія дроны.
5 верасьня Мінабароны Беларусі заявіла пра зьбіцьцё дронаў, у Гомлі прагучалі выбухі.
З жніўня расейскія бесьпілётнікі ўсё часьцей перамяшчаюцца з тэрыторыі Ўкраіны ў Беларусь.
10 жніўня Аляксандар Лукашэнка заявіў, што 9 жніўня сілы ВПС і войскаў СПА Беларусі былі прыведзеныя ў павышаную баявую гатоўнасьць у сувязі з парушэньнем паветранай прасторы Беларусі ў межах Касьцюковіцкага раёну. Ён тады заявіў, што гэта былі ўкраінскія бесьпілётнікі.
Пасьля гэтага міністар абароны Беларусі Віктар Хрэнін заявіў, што Лукашэнка даў загад узмацніць групоўкі войскаў на Гомельскім і Мазырскім тактычных кірунках. Паводле Хрэніна, «вайсковыя часткі сілаў спэцапэрацыяў, сухаземных войскаў, ракетных войскаў, у тым ліку рэактыўныя сыстэмы „Палянэз“ і комплексы „Іскандэр“, атрымалі задачы на зьдзяйсьненьне маршаў у прызначаныя раёны. Таксама ажыцьцявілі нарошчваньне сілаў і сродкаў зэнітна-ракетных войскаў, радыётэхнічных войскаў і авіяцыі».
Форум