У выніку расейскіх абстрэлаў у чатырох абласьцях Украіны ёсьць загінулыя і параненыя

У выніку расейскіх абстрэлаў за апошнія содні загінулі тры жыхары Данецкай вобласьці.

«8 верасьня расейцы забілі трох жыхароў Данеччыны — у Чаркаскім. Яшчэ 5 чалавек у вобласьці атрымалі раненьні», — паведаміў кіраўнік Данецкай вобласьці Вадзім Філашкін у сваім Telegram-канале 9 верасьня.

Як паведаміла ўкраінская служба Радыё Свабода, у Мікалаеўскай вобласьці ў выніку мінамётных і артылерыйскіх абстрэлаў загінула 70-гадовая жанчына.

У горадзе Дзергачы Харкаўскай вобласьці, паводле абласных уладаў, у выніку абстрэлаў загінула 76-гадовая жанчына, яшчэ 13 чалавек пацярпелі. У Купянскім раёне — двое параненых, і адзін чалавек атрымаў раненьні ад абстрэлу Бярозаўкі ў Багадухаўскім раёне Харкаўскай вобласьці.

У Херсонскай вобласьці 11 чалавек параненыя. Расейскія снарады трапілі ў жылыя кварталы вобласьці, крамы, газаправод і ў прыватныя аўтамабілі.

ГЛЯДЗІЦЕ ТАКСАМА:

У Сумах пад расейскі ракетны ўдар трапілі дзіцячы дом і цэнтар рэабілітацыі

Расейскія войскі атакуюць Украіну з розных відаў узбраеньняў. Нягледзячы на наяўнасьць доказаў, Масква ад пачатку поўнамаштабнага ўварваньня адмаўляе мэтанакіраваныя атакі на мірных жыхароў і сацыяльную інфраструктуру.