Выракі ў Бярозе
У судзе Бярозаўскага раёну 28 жніўня паводле ч. 1 арт. 342 Крымінальнага кодэксу («Актыўны ўдзел у дзеяньнях, што груба парушаюць грамадзкі парадак») вынесьлі прысуд адразу чатыром мясцовым жыхарам.
Як піша «Вясна», за ўдзел у акцыі пратэсту ў ноч з 10 на 11 жніўня 2020 году ў Бярозе Сяргею Скробату, Аляксандру Малькову, Ігару Шыманчыку і Сяргею Гоўшу прызначылі ад 1 да 2 гадоў калёніі. Такі прысуд вынес Дзьмітры Кавалевіч.
У сакавіку сілавікі правялі рэйды ў Бярозе за ўдзел у пасьлявыбарных акцыях пратэсту ў 2020 годзе. Тады паведамлялася пра затрыманьне каля дзесяці чалавек.
Кнігі гісторыка Мельнікава ўключылі ў сьпіс экстрэмісцкіх матэрыялаў
Суд Цэнтральнага раёну Менска 23 жніўня прызнаў кнігі гісторыка Ігара Мельнікава экстрэмісцкімі матэрыяламі. Міністэрства інфармармацыі дадало ў адпаведны сьпіс наступныя публікацыі , «а таксама іх копіі або іншыя кніжныя выданьні»:
- Нiчыпарук П.К., Мельнiкаў I.B. «Адысея палешука»;
- Мельнікаў, I.B. «Забыты корпус: гісторыя польскага войска на тэрыторыі Бабруйшчыны ў 1918, 1919-1920 гадах»;
- Мельнiкаў, I.B. «На „мяжы цывілізацый“. Старонкі гісторыі даваеннага савецка-польскага кардона ў Беларусі».
Ігар Мельнікаў — кандыдат гістарычных навук, які спэцыялізуецца на ваеннай гісторыі і гісторыі Беларусі ў складзе Польшчы ў 1921–1939-х гадах.
Раней стала вядома, што Мельнікава пачнуць судзіць 10 верасьня ў Менгарсудзе паводле абвінавачаньня ў садзейнічаньні экстрэмісцкай дзейнасьці (ч. 1 арт. 361-4 КК). Пра яго затрыманне стала вядома ў ліпені.
Затрымалі жыхарку Менска, якая вярнулася ў Беларусь з-за мяжы
На мяжы з Беларусьсю затрымалі маладую жанчыну з Менска, якая вярнулася ў Беларусь пасьля двух гадоў жыцьця і вандровак па розных краінах сьвету. Дзяўчыну прымусілі зрабіць заяву, у якой яна прызналася ва ўдзеле ў пратэстах 2020 году. Пра гэта стала вядома пасьля зьяўленьня відэазапісу на набліжаным да сілавікоў Telegram-канале.
Паводле «Мэдыязоны», якая знайшла старонку затрыманай дзяўчыны ў сацыяльнай сетцы, затрыманая — Кацярына Быстракова.
За «экстрэмізм» асудзілі байкера з Воршы
У судзе Аршанскага раёна і горада Оршы 29 жніўня асудзілі байкера Віктара Майстрэнку паводле ч. 2 арт. 19.11 КаАП (распаўсюд экстрэмісцкіх матэрыялаў). Справу разглядала суддзя Іна Кохава, паведамляе @vitebsk_info.
Вынік суда пакуль невядомы.
Форум