Такую заяву зрабіў 26 жніўня кіраўнік Цэнтру па супрацьдзеяньні дэзынфармацыі пры Радзе нацыянальнай бясьпекі і абароны (РНБА) Украіны Андрэй Каваленка ў інтэрвію «РБК-Україна».
Паводле ягоных слоў, «Лукашэнка проста імкнецца цяпер дапамагчы Пуціну, адцягваючы частку ўкраінскіх сіл і ўвагу ўкраінскага камандаваньня на гэты флянг і праганяючы гэтае пытаньне праз сваю прапаганду».
«Увесь гэты інфармацыйны шум накіраваны таксама на Расею, бо Лукашэнка вымушаны паказваць Пуціну, што ён нешта робіць. Ён, як хітры палітык, спрабуе Пуціна ўсё ж недзе падмануць у гэтай сытуацыі», — лічыць Каваленка.
25 жніўня МЗС Украіны выступіла з заявай, у якой заклікала «службовых асоб» у Менску «не рабіць трагічных для ўласнай краіны памылак пад ціскам Масквы» і «адвесьці войскі ад дзяржаўнай мяжы».
Войскі ўладам Беларусі прапанавана адвесьці «на адлегласьць, якая перавышае далёкасьць паражэньня наяўных у РБ сыстэм агню».
«Паводле дадзеных выведных органаў Украіны, Узброеныя сілы Рэспублікі Беларусь пад выглядам вучэньняў засяроджваюць значную колькасьць асабовага складу, у прыватнасьці, Сіл спэцыяльных апэрацый, узбраеньня і вайсковай тэхнікі, уключаючы танкі, артылерыю, РСЗА, сродкі СПА і інжынэрную тэхніку, у Гомельскай вобласьці паблізу паўночных межаў Украіны», — гаварылася ў заяве.
Сьцьвярджалася, што на мяжы зь беларускага боку «зафіксавана прысутнасьць наймітаў былой ПВК „Вагнэр“».
«Правядзеньне вучэньняў у пагранічнай паласе і ў непасрэднай блізкасьці да аб’екта атамнай энэргетыкі, Чарнобыльскай АЭС, стварае пагрозы нацыянальнай бясьпецы Ўкраіны і сусьветнай бясьпецы ў цэлым», — адзначаў украінскі МЗС.
Ведамства падкрэсьліла, што Ўкраіна „ніколі не рабіла і не зьбіраецца прадпрымаць ніякіх недружалюбных дзеяньняў супраць беларускага народу“.
25 жніўня Каваленка таксама напісаў у сваім тэлеграм-канале, што ўсе пагрозы наступу зь Беларусі «выключна інфармацыйныя, ня больш», а сілы абароны кантралююць сытуацыю.
У інтэрвію тэлеканалу «Расея» Аляксандар Лукашэнка заявіў, што Ўкраіна трымае каля беларускай мяжы больш за 120 тыс. салдат. «Бачачы іх агрэсіўную палітыку, мы ўвялі туды і разьмясьцілі ў пэўных пунктах — так, як гэта ў выпадку вайны, абароны было б — нашых вайскоўцаў», — сказаў ён.
Паводле сьцьвярджэньня Лукашэнкі, Кіеў узмацніў свой кантынгент пасьля таго, як у Беларусь былі перакінутыя расейскія войскі для ўдзелу ў парадзе 3 ліпеня: нібыта дзеля асьцярог, што яны нападуць з Гомельскай вобласьці, як у лютым 2022 году.
У адказ на гэта Лукашэнка, паводле яго слоў, перакінуў да ўкраінскай мяжы «амаль трэць арміі» на дадатак да сталага кантынгенту. Пасьля высьвятленьня сытуацыі праз каналы спэцслужбаў дадатковыя сілы былі адведзеныя абодвума бакамі.
У канцы чэрвеня ўлады Беларусі абвінавацілі Ўкраіну ў актывізацыі выведнай дзейнасьці, перамяшчэньні да мяжы баявых падразьдзелаў. Менск дэманстратыўна ўзмацніў ахову мяжы, выступіў з пагрозамі на адрас Кіева.
У сярэдзіне ліпеня Лукашэнка загадаў вярнуць войскі з паўднёвай мяжы ў месцы сталай дысьлякацыі, паколькі вайскоўцы справіліся з сытуацыяй «дыпляматычнай мовай».
Расейская прапаганда заявіла аб здрадзе з боку Лукашэнкі, паколькі, як сьцьвярджалася, ўкраінскія войскі, якія вызваліліся, былі перакінутыя з паўночнага кірунку на фронт, у тым ліку для наступальнай апэрацыі ў Курскай вобласьці РФ.
У выніку 10 жніўня Лукашэнка абвінаваціў Украіну ў парушэньні беларускай паветранай прасторы бесьпілётнымі лятальнымі апаратамі і загадаў вярнуць да паўднёвай мяжы адведзеныя ў ліпені войскі.
Сьпікер Дзяржаўнай памежнай службы Ўкраіны (ГПСУ) Андрэй Дземчанка паведаміў на наступны дзень, што служба ня бачыць зьменаў на мяжы.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум