У Міністэрстве абароны Расеі паведамілі аб зьнішчэньні 45 дронаў, запушчаных украінскімі сіламі.
Як адзначаецца ў афіцыйным паведамленьні, найбольш бесьпілётнікаў — 23 — выявілі над Бранскай вобласьцю, 11 — над Маскоўскай, 6 — над Белгарадзкай, тры — над Калускай і два — над Курскай абласьцямі.
У Маскве спынялі дзейнасьць аэрапортаў
Мэр Масквы Сяргей Сабянін заявіў аб самай маштабнай атацы на Маскву.
«Створаная эшалянаваная абарона Масквы ад варожых БПЛА дазволіла пасьпяхова адбіць усе атакі. Сілы СПА Мінабароны гэтай ноччу зьбілі 10 дронаў», — напісаў у сваім Telegram-канале Сяргей Сабянін.
У Фэдэральным агенцтве паветранага транспарту Расеі паведамілі, што ў трох маскоўскіх аэрапортах — Унукава, Дамадзедава і Жукоўскім — уначы на чатыры гадзіны ўводзіліся абмежаваньні на палёты. На запасныя аэрадромы за гэты час адправілі восем самалётаў. Раніцай усе абмежаваньні зьнялі і аэрапорты працуюць у штатным рэжыме.
У расейскіх рэгіёнах пакуль не паведамляюць аб наступствах на зямлі ад зьбітых дронаў.
У Генэральным штабе Ўзброеных сіл Украіны заявілі аб нанясеньні ўдару па Растоўскай вобласьці Расеі паблізу Новашахцінска, дзе знаходзіліся пазыцыі зэнітнага ракетнага комплексу С-300, зь якога расейцы абстрэльваюць памежжа Ўкраіны.
«У выніку аб’ектыўнага кантролю назіраліся выбухі ў вызначаных пунктах прыцэльваньня», — адзначаецца ў паведамленьні. У Генштабе дадалі, што яшчэ ўдакладняюць наступствы ад нанесенага ўдару. У той жа час пакуль незразумела, які быў удар, ракетны ці дронамі.
Ва Ўкраіне змагаюцца з чарговай хваляй дронаў
Ва Ўкраіне абвясьцілі трывогу праз атаку дронамі з боку Расеі ўвечары 20 жніўня. Але дагэтуль Паветраныя сілы краіны паведамляюць аб бесьпілётніках, якія працягваюць рухацца ў розных рэгіёнах.
Згодна з афіцыйнымі паведамленьнямі, расейскія дроны заходзілі на тэрыторыю Ўкраіны некалькімі групамі, накіроўваліся адразу на некалькі рэгіёнах і зьмянілі свае маршруты.
Расейскія бесьпілётнікі фіксавалі на поўначы, поўдні і ў цэнтры Ўкраіны. Пакуль у апэратыўным камандаваньні Паветраных сіл нават не паведамілі аб агульнай колькасьці зафіксаваных і зьбітых дронаў.
Пазьней у апэратыўным камандаваньні Паветраных сіл Украіны паведамілі, што Расея запусьціла 69 баявых дронаў. Сродкі супрацьпаветранай абароны зьбілі 50 бесьпілётнікаў у межах Хмяльніцкай, Палтаўскай, Чаркаскай, Кіеўскай, Віньніцкай, Івана-Франкоўскай, Днепрапятроўскай, Мікалаеўскай, Адэскай, Херсонскай, Данецкай, Кіраваградзкай, Сумскай і Чарнігаўскай абласьцей.
«Яшчэ 16 варожых БПЛА лякацыйна згубілі — імаверна, упалі пад уплывам радыёэлектронных сродкаў супрацьдзеяньня. Апроч таго, зафіксавалі перасячэньне варожым ударным дронам дзяржаўнай мяжы з Рэспублікай Беларусь у Чарнігаўскай вобласьці, яшчэ адзін расейскі БПЛА вярнуўся „на радзіму“ — у Белгарадзкую вобласьць», — адзначаецца ў афіцыйным паведамленьні.
На момант публікацыі яшчэ адзін дрон знаходзіўся ў паветранай прасторы Чаркаскай вобласьці.
Амэрыканскае выданьне forbes.com паведаміла, што Расея пачала выкарыстоўваць дроны, на якія ня могуць узьдзейнічаць сродкі радыёэлектроннай барацьбы.
Паводле выданьня, такія дроны расейцы пачалі выкарыстоўваць сёлета ў сакавіку, і цяпер — у часе баявых дзеяньняў на тэрыторыі Курскай вобласьці.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум