Паводле Кавалеўскага, Агенцтва эўраатлянтычнага супрацоўніцтва створанае для дасягненьня інтэграцыі незалежнай, сувэрэннай, дэмакратычнай Беларусі ў склад эўраатлянтычнай супольнасьці.
Валер Кавалеўскі адзначыў, што АЭС — незалежная, нацэленая на вынік каманда з экспэртызай у галіне міжнародных адносін і камунікацый. Паводле яго, удзельнікі структуры АЭС, якая базуецца ў Варшаве і дзейнічае ў розных краінах, будуць працаваць з урадамі, міжнароднымі арганізацыямі, дэмакратычным рухам, аналітычнай супольнасьцю і СМІ.
«АЭС будзе працаваць разам з замежнымі і беларускімі ўдзельнікамі, каб распрацаваць такія палітыкі і зрабіць практычныя крокі (...) АЭС будзе працаваць над тым, каб расейская пагроза была прызнаная, што павінна прывесьці да новай міжнароднай стратэгіі і адпаведных практычных крокаў. Беларусь павінна выйсьці з расейскай вайны супраць Украіны, каб захаваць сваю незалежнасьць і дапамагчы Ўкраіне перамагчы агрэсараў», — заявіў Валер Кавалеўскі.
Ён зазначыў, што ягоная каманда будзе працаваць над умацаваньнем існых і стварэньнем новых міжнародных мэханізмаў для прасоўваньня справы дэмакратычнай Беларусі.
«Сумесна з партнэрамі мы будзем працаваць над дарожнымі картамі для інтэграцыі Беларусі ў эўраатлянтычную супольнасьць. Мы будзем садзейнічаць стварэньню праграмаў па павышэньні патэнцыялу для беларусаў, каб забясьпечыць гэты прагрэс», — зазначыў палітык.
Валер Кавалеўскі — выканаўчы дырэктар АЭС, Антон Пянькоўскі — дарадца па замежнай палітыцы, Кірыл Данько — дырэктар па камунікацыях.
Кавалеўскі ў Аб’яднаным пераходным кабінэце займаў пасаду намесьніка Сьвятланы Ціханоўскай ў міжнародных справах. Ён пакінуў Кабінэт у канцы чэрвеня.
Форум