Пра гэта заявіў украінскі прэзыдэнт Уладзімір Зяленскі ў размове з BBC.
«Гэта ня значыць, што трэба адваяваць у баях усе тэрыторыі. Я лічу, што гэтага можна дабіцца з дапамогай сродкаў дыпляматыі», — сказаў Зяленскі.
Ён падкрэсьліў, што сытуацыя на полі бою можа забясьпечыць Украіне больш моцную перамоўную пазыцыю.
«Я думаю, што калі мы будзем дзейнічаць узгоднена і прытрымлівацца фармату саміту міру, то мы можам скончыць гарачую стадыю вайны. Мы можам паспрабаваць гэта зрабіць да канца гэтага году», — заявіў прэзыдэнт Украіны.
Ад Вялікай Брытаніі, паводле Зяленскага, Кіеў хацеў бы атрымаць дазвол на выкарыстаньне заходняй зброі для ўдараў па тэрыторыі Расеі без абмежаваньняў далёкасьці.
«Мы проста хочам біць дакладна па тым пункце, зь якога яны страляюць па нас», — падкрэсьліў Зяленскі.
Прэзыдэнт Украіны таксама адзначыў, што гатовы працаваць зь любым выбраным прэзыдэнтам ЗША. Зяленскі ўдакладніў, што супрацоўніцтва з Дональдам Трампам, калі ён зноў стане прэзыдэнтам, будзе цяжкай працай.
Раней на гэтым тыдні Трамп назваў кандыдатам у віцэ-прэзыдэнты ЗША 39-гадовага сэнатара ад штату Агаё Джэя Д. Вэнса, які выступаў супраць амэрыканскай вайсковай дапамогі Ўкраіне.
Гэта ўзмацніла асьцярогі, што ў выпадку прыходу Трампа да ўлады Вашынгтон скароціць падтрымку Кіева.
Зяленскі даў інтэрвію BBC падчас знаходжаньня ў Вялікай Брытаніі. Прэзыдэнт Украіны ў якасьці госьця ўдзельнічае ў саміце Эўрапейскай палітычнай супольнасьці. У чацьвер Зяленскі сустрэўся з каралём Карлам III і з прэм’ер-міністрам Вялікай Брытаніі Кірам Стармэрам.
Стармэр раней паабяцаў падтрымліваць Украіну столькі, колькі спатрэбіцца, і абвясьціў аб штогадовай дапамозе Кіеву ў памеры 3 мільярды фунтаў (4 мільярды даляраў).
Масква інтэрвію Зяленскага BBC пакуль не камэнтавала. Раней Крэмль заяўляў, што ніколі не адмаўляўся ад перамоваў, але называў украінскія патрабаваньні не адпаведнымі новым рэаліям.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум